اختبار الايلتس هو اختبار مقياس للغة الإنجليزية، يقيس مهارات اللغة الأربعة بشكل أساسي وهي: الاستماع.. القراءة.. الكتابة والمحادثة.
وما يميز اختبار الايلتس أنه مقبول ومعترف به في كل دول العالم حتى أمريكا، وبالتالي أصبح اختبار الايلتس هو الاختبار الأول عالميا متخطيا حتى منافسه الأشهر (اختبار التوفل).
ليش أحتاج اختبر الايلتس؟
لا غنى عن اختبار الايلتس اذا كنت تتطلع إلى مستقبل تعليمي أو وظيفي كويس.. فالكثير من المؤسسات التعليمية والوظائف المرموقة تطلب اختبار الايلتس كشرط قبول، كمان راح تحتاجه إذا كنت تفكر في السفر للخارج سواء ابتعاث أو للتعليم أو العمل .. أو حتى إذا نويت الهجرة.
اقسام اختبار الايلتس:
الاختبار عبارة عن أربعة أقسام.. ثلاثة منهم تكون اختبار تحريري والقسم الرابع وهو المحادثة يكون عبارة عن مقابلة شخصية مع المختبر وجهاً لوجه لمدة ١٥ دقيقة.. ومن هنا يمديك تعرف تفاصيل اكثر عن اختبار المحادثة.
بتفصيل أكثر.. القسم التحريري يكون ٣ اجزاء
- 🎧 الاستماع
ويكون عبارة عن ٤٠ سؤال تتنوع بين الفراغات والاختيارات.. وشريط تسمعه وتجاوب هذي الاسئلة في نفس الوقت لمدة ٣٠ دقيقة.. من هنا يمديك تعرف تفاصيل اكثر عن هذا القسم.
- 📖 القراءة
في هذا القسم حيكون عندك ٣ قطع اكاديمية طويلة وعليها ٤٠ سؤال تحتاج تجاوبهم في خلال ٦٠ دقيقة.. من هنا يمديك تعرف تفاصيل اكثر عن هذا القسم.
- 📝 الكتابة
يتكون من سؤالين تاسك ١ وتاسك ٢.. عليك تكتب مجموع ٤٠٠ كلمة في خلال ٦٠ دقيقة.. من هنا يمديك تعرف تفاصيل اكثر عن هذا القسم.
آلية التصحيح والتقييم في اختبار الايلتس:
درجة اختبار الايلتس تكون من صفر إلى ٩.. ودائما تكون الدرجة اما درجة صحيحة او نص.. مثلا ممكن تكون درجتك ٦ او ٦.٥ لكن ما راح تكون ٦ وكسور زي الربع او الثلث.. وهذا الانفوجرافيك راح يوضح لك ايش معنى كل درجة من صفر الى ٩
ودرجتك الكلية في اختبار الايلتس تكون عبارة عن مجموع درجتك في الاربع اقسام وتقسم على الاربعة ويكون هذا المتوسط هو درجتك.. بمعنى انه اذا درجتك مثلا في الأقسام
الاستماع ٦
القراءة ٦
الكتابة ٦
المحادثة ٦
راح تكون درجتك (٦+٦+٦+٦ = ٢٤) اقسم ٢٤/٤ = راح تكون درجتك ٦
وممكن يصير انه مجموع الأربع أقسام يكون في كسور زي مثلا ٧.٦٢٥ في هذي الحالة راح تقرب درجتك لأقرب نص وتصير ٧.٥ بدل ٧.٦٢٥ لانه زي ما قولت لك قبل شوية الدرجة ما ينفع تكون بالكسور
هل الايلتس اختبار صعب؟
اولا:
كل واحد منكم يعتقد ان الايلتس اختبار صعب و معقد.. أنا كمان كنت زيك في البداية، كنت اعتقد ان الاختبار مرة صعب وما يمديني أوصل للدرجة اللي ابغاها.. لكن مع تجربتي اكتشفت انه هذا الإعتقاد خاطئ، ودحين راح افصلك أكثر ليش..
اختبار الايلتس معياره كبير ودرجته من صفر إلى ٩.. يقيس مستوى الشخص اللي لغته صفر وكمان مستوى النيتف الاكاديمي.. وأنت مو مطلوب منك توصل للـ ٩.. أقصى درجة تتطلبها أقوى جامعة هي ٧ أو ٧.٥.. وهذا معناه انه عادي تكون ٣٠٪ من إجاباتك خطأ..
إذا حسبت انه لازم تجيب الـ ٩ من ٩ وقتها حيكون الايلتس بالنسبة ليك صعب وتحتاج وقت طويل.. لكن عشان توصل للدرجة اللي حتكون مطلوبة منك في معظم الأحيان اللي هي ٦ أو ٧ راح تلاقي الموضوع غير معقد وراح توصل للدرجة في خلال شهور مهما كان مستواك.
ثانيا:
اختبار الايلتس لا يعتمد فقط على اللغة ولكن يعتمد على ثلاث أعمدة أساسية
- المهارات.
- التكنيكات.
- الممارسة.
إذا ما وازنت مذاكرتك وأهملت أحد هذي الأعمدة معناه انك راح تعاني وما راح توصل للدرجة بسهولة وتحسب انه الايلتس صعب لكن الحقيقة أنه أنت تذاكر بشكل خاطئ. لأنه الايلتس لا يعتمد على اللغة فقط.. والدليل انه كثيرين يسافروا وتعلق درجتهم على ٥ أو ٥.٥ ويرجعوا من الابتعاث بدون تحقيق أهدافهم لانهم ما ذاكرو صح بالطريقة اللي يتطلبها الاختبار.
ثالثا:
معظمنا يبدأ يستعد للايلتس من مستوى مبتدئ أو أقل من المتوسط عشان يوصل لدرجة تقريبا بين ٦ و ٧.. يعني تحتاج يتغير مستواك في اللغة بالكامل وتصير في مستوى فوق المتوسط.. صح الموضوع مهو صعب لكن يحتاج تكون إيجابي بواقعية وتعطي الوقت الكافي للمذاكرة.
إذا حجزت اختبار بعد أسبوعين وأنت مستواك أقل من المتوسط طبيعي حيكون الايلتس صعب بالنسبة ليك لانه ما أعطيت الوقت الكافي لتحقيق الدرجة.. زي بالضبط كأنه دخلت الجيم لأول مرة وتقرر ترفع حديد بوزن ٥٠ كيلو فطبيعي راح تلاقي الموضوع مستحيل.
مهم كمان تعرف ” قاعدة الـ ١٠٠ ساعة” وهي انه كل درجة تحتاج ترفعها لازم تخصص لها ١٠٠ ساعة مذاكرة موزعة بين اللغة والتكنيكات والتدرب.. شوف الموضوع بواقعية إذا وصلت درجة ٦.٥ يعني لغتك صارت ممتازة في الحياة العامة تقدر تتكلم مع الناس وما عندك مشكلة.. باختصار مهي درجة على ورقة هو مجهود لازم تبذله عشان تغير مستواك بالكامل.
أنواع اختبار الايلتس:
قبل ما تقرر تحجز اختبارك مهم تكون عارف ايش نوع اختبار الايلتس اللي تحتاجه.. صح كل اختبارات الايلتس ما في اي فروق جوهرية بينهم تكون هي نفسها من حيث الهيكلة ومستوى الصعوبة لكن بعض الجهات طالبة الاختبار تشترط نوع محدد يكون مقبول عندها.. ودحين راح اوضح لك ايش هذي الانواع
١- اختبار الايلتس الأكاديمي:
هذا اكثر نوع مطلوب.. يحتاجه تقريبا ٩٥٪ من المختبرين للأغراض الأكاديمية زي التقديم للجامعات والابتعاث وحتى الوظائف داخل السعودية معظمها تقبل الاختبار الأكاديمي.
٢- اختبار الايلتس العام:
هذا النوع يكون مطلوب للهجرة والوظائف في الدول الأجنبية.. ويعتبر هذا النوع أسهل شويتين من الاختبار الأكاديمي، وتجي هذي السهولة في قسم القراءة يكون في الاختبار العام القطع ابسط وأقصر، وكمان تاسك ١ في الكتابة يكون في الاختبار العام يكون كتابة رسالة مهو كتابة تقرير زي الاختبار الاكاديمي .
٣- اختبار الايلتس UKVI:
تحتاج هذا النوع إذا قررت السفر لبريطانيا سواء للدراسة أو العمل أو الهجرة.. موجود منه النوعين (أكاديمي وعام) والفرق بينه وبين الايلتس العادي يظهر في الإجراءات الأمنية فتكون مشددة وأكثر صرامة في هذا الاختبار.
في حالة انه درجتك راحت للتحقيق راح يوصلك ايميل انه النتيجة راح تتاخر شويتين بسبب التحقيق.. اذا كانت امورك طبيعية راح تظهر الدرجة بعد فترة ممكن اسبوعين.. لكن إذا كان عندهم ملاحظات على درجتك راح تعيد الاختبار مرة ثانية لكن مجانا يعني الايلتس نفسه راح يتحمل بتكاليف اعادة الاختبار
طرق اجراء الاختبار:
ايش تفضل؟ ورقة و قلم ام كمبيوتر؟ دحين يمديك تختار حسب الطريقة الأنسب ليك بين طريقتين:
📑 اختبار ورقي
وفيه يكون الجزء التحريري من الاختبار (القراءة.. الاستماع.. الكتابة) ورقيا تجاوب بخط يدك.. واختبار المحادثة يكون مقابلة شخصية.. وفي هذا النوع دائما يكون وقت الاختبار الساعة ٩ صباحا وتظهر النتيجة بعد ١٣ يوم من تاريخ الاختبار التحريري..
👨🏻💻 اختبار محوسب
وفيه يكون الجزء التحريري كامل على الكمبيوتر.. ميزة هذا النوع انه متوفر الاختبار في مواعيد مختلفة مهو فقط صباحي وكمان راح تلاقي متوفر في مواعيد أكثر طوال الأسبوع.. وتظهر النتيجة في خلال ٧ أيام من تاريخ الاختبار.. لكن لا انصحك بهذا النوع إذا منت متعود على الكتابة على الكمبيوتر…
طرق حجز الاختبار:
حجز اختبار الايلتس دائما يكون اونلاين.. تدخل الموقع وتختار موعد الاختبار وتختار نوع الاختبار وإذا حاب تختبر محوسب ولا ورقي وتعبي بياناتك كاملة وبعدها تدفع المبلغ في خلال ٤٨ ساعة سواء بالفيزا او الحوالة البنكية.. ومبلغ الاختبار هذا دائما يكون ثابت تقريبا حوالي ١٣٠٠ ريال سعودي ولازم تختبر في جهات الايلتس الرسمية.
جهات الاختبار:
الايلتس له جهتين معتمدتين وهما
١- البريتش كونسل
٢- مراكز الـ IDP
هذي هي الجهات الرسمية لاختبار الايلتس يمديك تختبر في اي مركز تفضله منهم.. ما في اي اختلاف من حيث مستوى صعوبة الاختبار وهيكلته او حتى اعتمادية الشهادة.
التسجيل المخفض:
اتفقنا قبل شوي انه الايلتس له جهتين رسميتين فقط يمديك تختبر من خلالهم.. لكن في شيء كمان اسمه “التسجيل المخفض” وهو عبارة عن حجز الاختبار عن طريقي بسعر مخفض وتختبر في مراكز الاختبار عادي بشكل طبيعي.. ومن خلال شراكتي مع جهات الايلتس الرسمية بتكفل بمبلغ ٢٤٠ ريال من سعر الاختبار الاصلي.. يعني راح يصير الاختبار بمبلغ ١٠٦٠ ريال بدل ١٣٠٠ ريال.. يمديك تعرف تفاصيل اكثر وتحجز من هنا
اسئلة وأجوبة:
ودحين بعد ما صار عندك خلفية قوية وتفصيلية عن اختبار الايلتس راح اشاركك اهم الأسئلة اللي تتكرر من المتابعين عن الاختبار والاجوبة عشان يكون عندك فكرة اعمق واشمل عن كل سؤال ممكن يجي في ذهنك عن الاختبار
ينفع اجل الاختبار او الغيه بعد ما دفعت الرسوم؟
ممكن تلغي الاختبار او تاجله بس عليك إبلاغ المركز خطياً قبل ٣٥ يوماً على الأقل من موعد اختبارك الكتابي وعندها فقط يمكنك استرداد الرسوم المدفوعة و يتم خصم ٢٥٪ من الرسوم.. اي ما يعادل تقريبا ٢٨٠ ريال سعودي كرسوم إدراية من الرسوم المستردة في الحالتين وسوف يطلب منك إحضار إيصال الدفع الأصلي
ولا يسمح باسترداد الرسوم المدفوعة مقابل امتحان الايلتس خلال الأسابيع الخمس التي تسبق موعد الاختبار الكتابي، الا في حالات معينة
١- المرض الخطير (على سبيل المثال دخول المستشفى أو الإصابة الخطيرة
٢- التعرض لصدمة- على سبيل المثال الوقوع ضحية لجريمة، أو لحادث سير
٣- الخدمة العسكرية
٤- حالات الوفاة – وفاة أحد أفراد العائلة المقربين
وضروري يستلم المركز طلب الإلغاء أو تغيير الموعد خلال خمسة أيام من موعد اختبارك الكتابي مرفقاً بالوثائق الأصلية التي تثبت الحالة الاستثنائية مثل تقرير رسمي مصدق، ولا تقبل النسخ.
ايش معنى حجب الدرجة؟
بعض الاحيان تخلص فترة انتظار النتيجة (١٣ يوم اذا اختبارك ورقي و ٧ ايام اذا اختبارك محوسب) لكن ما تظهر الدرجة.. لانه راحت للتحقيق في مقر الايلتس نفسه..
وممكن يصير حجب الدرجة بسبب:
١- اذا كانت درجتك في اختلاف كبير بين الاقسام.. مثلا درجتك في المحادثة ٣ والكتابة ٤ وفي الريدنج ٧.٥ والاستماع ٨.. في هذي الحالة لازم يتحققو من درجتك
عشان يتاكدو انه ما صار غش
٢- اذا اختبرت وكانت درجتك ٣ واختبرت مرة ثانية بعد شهرين وكانت درجتك ٧.٥ في هذي الحالة كمان احتمال تروح درجتك للتحقيق عشان يتاكدو إذا في غش او لا.
ينفع شخص يستلم الشهادة بالنيابة عني؟
ايه ممكن شخص ينوب عنك في استلام الشهادة و في نموذج معين تعبيه ببيانات الشخص اللي تبغاه يستلم النتيجة.
ما عندي رقم بريدي ايش اسوي ؟
في هذي الحالة راح تستلم النتيجة بنفسك من المركز او اكتب وقت التسجيل رقم جوالك و راح يتواصل معك عشان يسلمك الشهادة و ارسال الشهادة عبر البريد اول مرة بتكون مجانا و اذا احتجتها مرة ثانية بيكون في رسوم لو داخل السعودية ٦٠ ريال و خارج السعودية ١٦٠ ريال.
كم مدة اعادة التصحيح؟ وكم الرسوم ؟
اعادة التصحيح بيكون في خلال ستة أسابيع من تاريخ إجراء الامتحان، كما يمكنك تحديد أقسام معينة من الامتحان لإعادة تصحيحها .. واقصى حد للنتيجة تظهر خلاله ٨ اسابيع و بيكون مقابل رسوم ٦٨٠ ريال يمكن استرداد الرسوم كاملة في حال ارتفعت الدرجة، ولا يتم رد الرسوم إذا بقيت الدرجة كما هي.
ممكن اختبار المحادثة يجي عن اهم الأحداث في السعودية زي قيادة السيارات ؟
لا اختبار المحادثة بيكون نماذج معينة و معلومات عامة و بيكون اختيار الاسئلة عشوائي من نماذج معدة من قبل .
ينفع بعد ما حجزت ايلتس عادي اغير الحجز ل UKVI؟
ممكن تتواصل مع المركز و راح يحول اختبارك من ايلتس عادي لاختبار UKVI.
ممكن اغير موعد اختبار المحادثة؟
اذا تم تحديد موعد اختبار المحادثة ما راح يتغير .
كيف ارسل درجتي للجامعة؟
يمديك تطلب من المركز ارسال درجتك لخمس جامعات او مؤسسات مجانا.. ويكون ارسال النتيجة من طرف المركز للجامعة اونلاين.. الا اذا جامعتك ما عندها نظام التحقق من الدرجة اونلاين.. راح ترسل لها نسخة ورقية.
هل يمديني اطلب ارسال اكثر من ٥ نسخ؟
يمديك تطلب ارسال اي عدد تبغاه للجامعات ولكن راح تدفع رسوم اضافية ٦٣ ريال اذا الجامعة داخل السعودية و ١٦٨ ريال اذا الجامعة خارج السعودية.
هل المركز يراعي وضعي وانا من ذوي الاحتياجات؟
أكيد المركز راح يوفر ليك التسهيلات والتجهيزات المناسبة اللي تساعدك في تأدية اختبارك.. ولكن تحتاج تحجز اختبارك بدري (قبل ٣ اشهر على الأقل) وتختار وأنت تحجز ايش المشكلة اللي عندك.. وبعدها تتصل بالمركز تبلغهم عشان يتفقو معاك كيف حيتم تسهيل الاختبار ليك.
إذا استفدت شارك هذا المقال 💛
وإذا عندك اي سؤال ارسلي في تويتر من هنا
0 تعليق