اختبار الكتابة هو آخر جزء في القسم التحريري باختيار الايلتس وينقسم إلى مهمتين.. “المهمة الأولى والمهمة الثانية”

عندك وقت للقسم كاملا ٦٠ دقيقة تقسمهم على المهتمين الأولى والثانية.. لكن ما راح تتعامل مع الوقت بشكل عشوائي ولا راح تقسمه بالتساوي بين المهمتين..

انصحك دائما تعطي ٢٠ دقيقة لحل التاسك ١ و٤٠ دقيقة لتاسك ٢ لانه أطول وكمان أهم – عليه ثلثين الدرجة – وتاسك ١ عليه ثلث الدرجة لكن في نفس الوقت لازم تحل السؤالين، إذا حليت سؤال واحد حتى ولو بهيكلة قوية راح تنخسف درجتك 

وفي السطور الجاية راح أوضح لك أكثر تفاصيل هذا القسم.

تاسك 1️⃣

في الاختبار الأكاديمي  يكون تاسك ١ عبارة عن رسم بياني وعليك تكتب عنه تقرير مكون من ١٥٠ كلمة.. وهنا راح توصف العناصر الموجودة في هذي الرسمة.. بمعنى آخر في هذي المهمة ما عليك إلا انك تحول الرسمة اللي قدامك إلى تقرير مكتوب.. لا آراء شخصية، لا معلومات مطلوبة منك، ولا تحتاج خلفية عن الموضوع. هو مجرد وصف للأحداث الموجودة بالرسمة وعليك ترتبها وتصيغها بشكل مرتب وواضح وبدون اخطاء قد ما تقدر.

لكن في الاختبار العام تكون هذي المهمة عبارة عن كتابة رسالة (رسمية أو غير رسمية) وعدد الكلمات المطلوب نفس الأكاديمي ١٥٠ كلمة.

تاسك 2️⃣

هذا التاسك عبارة عن سؤال مقالي.. يعطيك قضية معينة ويطلب منك تكتب عنها مقال مكون من ٢٥٠ كلمة حسب نوع السؤال اللي عندك.. وتتنوع هذي الأسئلة بين أسئلة جدلية يكون مطلوب منك تتكلم وتناقش رأيين زي:

• الايجابيات والسلبيات
• توافق أو لا توافق
• ناقش الطرفين
• اذكر رأيك

 وفي نوع ثاني من الاسئلة اللي هي الأسئلة التعدادية وهنا عليك تعدد النقاط بموضوع معين زي:

• أسباب وحلول
• مشاكل واسباب

✔️ تصحيح قسم الكتابة

قسم الكتابة لا يتم تصحيحه آليا عن طريق جدول ثابت لحساب درجتك بناء على عدد اجوبتك الصح زي الاستماع والقراءة.. لكن يتم تصحيحه بناء على تقييم مصححين حقيقين وبناء على عدة معايير اللي إذا تأكدت من صحتها راح تضمن أعلى درجة بقسم الكتابة إن شاء الله.

⚖️ معايير التقييم

المصحح في قسم الكتابة راح يصحح كتابتك بناء على معايير ثابتة للتقييم.

💯 إكمال المطلوب

هذي أول نقطة عليك تنتبه لها وهي أساس كل المعايير الجاية لأنه منطقيا أول شيء عليك تسويه انه تفهم ايش يبغى السؤال، يعني عليك تكتب في صلب موضوع السؤال.. مثلا في تاسك ١ حيكون عندك رسم بياني لازم تكتب البيانات الموجودة في الرسم ولا تخترع معلومات من مخك.. ونفس الشيء في تاسك ٢ إذا يسألك مثلا عن ايجابيات وسلبيات التعليم بالنسبة للأطفال ما ينفع تكتب عن ايجابيات وسلبيات التعليم بالنسبة لطلاب الجامعة.

كمان مهم  توصل لعدد الكلمات المطلوب، يعني تكون عدد كلماتك في تاسك ١ بين ١٥٠ إلى ١٧٠ كلمة وفي تاسك ٢ بين ٢٥٠ إلى ٢٧٠ كلمة..  لكن إذا كتبت كلمات أقل أكيد راح تتأثر درجتك.

🧬 التناسق والترابط

لازم وانت تكتب تكون أفكارك منطقية ومتسلسلة وعشان تكون كتابتك مرتبة وأفكارك منطقية مهم تتبع هذي النقاط:

1. استخدم جمل ربط: ما ترمي الجمل عشوائيا لازم عشان تكون بنية كلامك قوية تربطها مع بعض بهذي الكلمات زي however, moreover, although وهكذا
2. قسّم كتابتك لفقرات: التنسيق والترتيب جدا مهم ما تكتب الموضوع  سطور ورا بعض بشكل عشوائي،  لازم تقسم كتابتك على ٤ فقرات مقدمة.. عرض أول.. عرض ثاني.. خاتمة.
3. قسّم الفقرات لجمل منطقية ومتدرجة في الأفكار..وإذا التزمت بالطرق هذي راح تضمن أفكار مترابطة وكتابة متناسقة.. ولا تنسى انه استخدام قالب الكتابة راح يساعدك بقووة في تحقيق هذا المعيار.

🆕 الكلمات

هنا عليك تكون في حالة هجوم ودفاع في نفس الوقت بمعنى أنه مهم تستخدم كلمات أكاديمية قوية مو لغة بسيطة وفي نفس الوقت تكون الكلمات صحيحة ما فيها أخطاء املائية.. يعني مثلا إذا كتبت tackle حيكون أفضل بكثير من solve. قد ما كان أسلوبك أقوى قد ما كان مؤشر أفضل لمستواك بالكتابة وهذا اللي يحتاج المصحح انه يعرفه.

🤓 الجرامر

في هذا المعيار كمان عندك نفس المعادلة الصعبة.. تحتاج تستخدم جرامر قوي وجمل معقدة وفي نفس الوقت صحيح بدون أغلاط.. وكمان جدا مهم تستخدم الزمن الصحيح للموضوع، يعني ما ينفع تتكلم عن مشاكل عام ٢٠٠٠ وانت تستخدم زمن المستقبل أو تتكلم عن تكنولوجيا المستقبل بزمن الحاضر وهكذا..

الخلاصة: 
قد ما تقدر وازن بين الأخطاء وصعوبة الجرامر لانه استخدامك جرامر مرة قوي  فيه شوية أخطاء، راح يكون أفضل بكثير من استخدامك جرامر كله صح لكن بسيط وراح يساعدك تجيب درجة أقوى.

هذي المعايير الأربعة ياخذها المصحح بعين الإعتبار وتحسب بالتساوي، بمعنى انه معيار الجرامر بنفس أهمية معيار اكمال المهمة وبالتالي إذا خبصت في أحد هذي المعايير لكن المعايير الباقية كويسة لسه يمديك تجيب درجة قوية.

وأخيراً.. عشان تبدع بأي شيء لازم تعرف تفاصيله عن قرب.. ودحين بعد ما عرفت تفاصيل قسم الكتابة صار عليك تتعمق أكثر وتبدأ في دراسة التكنيكات وطرق الحل ثم التدرب في المقالات الجاية.

😟 صعوبة قسم الكتابة:

أولا الوقت:
عندك فقط 60 دقيقة مطلوب تكتب فيهم 400 كلمة مقسمة بين 150 كلمة لتاسك 1 و 250 كلمة لتاسك 2 فلازم توزع وقتك بشكل صحيح ووضحت الطريقة في تكنيكة تقسيم الوقت.

ثانيا:
الأفكار والفوكابلري في تاسك 2 الى حد كبير بتكون معقدة وتحتاج مرررة تركيز وحصيلة أفكار وكلمات قوية،. وهنا تطوير مهارة الكتابة وحفظ الكلمات الاكاديمية واستخدام القالب راح يساعدوك بشكل مرة كبير.

ودحين راح أعطيك نصائح تساعدك تعرف ايش اللي تسويه واللي ما تسويه في اختبار الكتابة.. ممكن تبدو نصائح بديهية لكن مهم تكون عارفها وتطبيقها راح يساعدك ترتفع درجتك من نص درجة إلى درجة كاملة.

أولا “سوي”: ✅

راح أقولك دحين اهم ٧ نصائح عليك تسويها وأنت في اختبار الكتابة.

١- ابدأ دائما بتاسك ٢:

لأنه تاسك ٢ هو الأطول تحتاج تكتب ٢٥٠ كلمة.. وعليه ثلثين درجتك في الاختبار وتحتاج تألف وتكتب المعلومات من مخك ماهو زي تاسك ١ راح تكتب المعلومات اللي شايفها قدامك في الرسم.

٢- نوع في الجرامر والفوكاب:

استخدام جرامر قوي وكلمات أكاديمية من معايير تقييمك في اختبار الكتابة.. مهم ما تكرر نفس الفكرة أكثر من مرة وكمان الكلمات حاول لا تستخدم نفس الكلمة أكثر من ثلاث مرات، وفي الجرامر وازن كتابتك بين الجرامر المعقد والبسيط لا تستخدم الأزمنة البسيطة فقط إذا تبغا درجة قوية.

٣- انتبه لعلامات الترقيم:

علامات الترقيم هي جزء من الجرامر وبالتالي استخدامها شيء جدا مهم، إذا أهملتها راح يتأثر عندك معيار الجرامر وبالتالي تضيع منك درجات على الفاضي.

٤- استخدم المرسام (القلم الرصاص):

وانت تكتب طبيعي ممكن تغلط في السبلنغ أو تحب تغير فكرة حسيت انها مو مناسبة للكلام وبالتالي راح تحتاج تشخمط وتكمل.. إذا استخدمت القلم راح يكون شكل الورقة مكركب وممكن ما تلاقي مكان تكمل اجابتك.. عشان كدا أفضل شيء تستخدم المرسام عشان يمديك تعدل الأخطاء بسهولة.

٥- اترك سطر بين كل فقرة:

كتابتك لازم تكون متناسقة ومرتبة في شكل فقرات ويكون واضح للمصحح بداية ونهاية كل فقرة، فمهم تترك مسافة سطر واحد بين كل فقرة، لا تكتب كل السطور بشكل متصل ولا تكتب سطر وتترك سطر .

٦٠ اعادة صياغة المقدمة:

ممنوع تماما في اختبار الايلتس تستخدم نفس عبارات السؤال والا ماراح تحسب هذي الجملة اللي نقلتها.. دائما سوي اعادة صياغة للسؤال واستخدم مرادفات للكلمات الموجودة في السؤال.

٧- راجع كتابتك:

نظرة سريعة إحتمال ترفع درجتك لدرجة كاملة.. بعد ما تخلص اجابتك راجع كتابتك بسرعة وتأكد انه مافي أخطاء سخيفة يمديك بنفسك تصححها.. دائما راح تلاقي حرف زائد.. حرف ناقص أو حتى كلمة مهي في المكان المناسب أو عندك أفضل منها.. كل هذي الأمور يمديك تعدلها بنظرة سريعة على اجابتك في اخر كم دقيقة.

ثانيا “لا تسوي”: ❌

ودحين راح أقولك ايش الأشياء اللي عليك تتجنبها تماما في الاختبار.

١- لا تحل سؤال واحد:

من أولى المعايير الأساسية في تقييم كتابتك إكمال المهمة.. بالتالي إذا حليت سؤال واحد حتى ولو بشكل جدا قوي راح تخسر درجات كثيرة وتنخسف درجتك.. أفضل بكثير أنه تحل السؤالين بكتابة متوسطة عن أنه تحل سؤال واحد قوي.

٢- توسط في عدد الكلمات:

لا تتحمس وتكتب كثير وإلا راح تخسر درجات.. هذا الكلام عكس توقعاتك لكن اللي يصير انه إذا كتبت كثير أكيد راح يكون عندك أخطاء أكثر، ويحاسبك المصحح على هذي الأخطاء عشان كذا أفضل دائما انه تكتب في تاسك ١ من ١٥٠ الى ١٧٠ كلمة وفي تاسك ٢ من ٢٥٠ إلى ٢٧٠ كلمة.

٣- لا تستخدم كلمات احتمال تكون خطأ:

صح مهم تستخدم كلمات أكاديمية قوية لكن في نفس الوقت مهم يكون استخدام الكلمة في المكان الصح والسبلنغ صح.. إذا كتبت الكلمة وحاسس انه استخدامها خطأ أو مو متأكد من السبلنغ لا تستخدمها أفضل، لانه بنسبة ٨٠٪ حيكون احساسك صح وتخسر درجات في معيار الكلمات.

٤- تدقق في خطك:

أهم شيء لازم تراعيه في اختبار الايلتس انه يكون خطك مقروء.. لكن ما تجلس تضيع وقت كثير في انه تكتب بخط مرتب وحلو وواضح لانه راح ينتهي الوقت وانت لسه ما جاوبت السؤالين.

٥- لا تعد الكلمات كلمة كلمة:

عشان يمديك تعرف كتبت كم كلمة في الإختبار لا تضيع وقت وتعد كلمة كلمة.. أفضل شيء انه تعد عدد الكلمات اللي كتبتها في السطر الأول واضربها في عدد السطور راح تعرف بشكل تقريبي كتبت كم كلمة.. ممكن تزود على هذا العدد ٢٠ كلمة كمان عشان تكون في أمان. 

٦- تحفظ أجوبة كاملة:

لا تستخدم أبدا قوالب بفراغات بسيطة اللي يكون كلمة أو كلمتين فقط في الفراغ.. لانه المصحح أكيد حيكون عارف انه هذي الاجابة محفوظة لأنه ببساطة مستحيل يمديك تعبر عن أفكارك في صميم موضوع السؤال بهذي العبارات المحفوظة.

٧- خطط لكتابتك:

لا تكتب اجابتك بشكل عشوائي، رتب أفكارك وسوي هامش بورقة الأسئلة اكتب فيه كل أفكارك حتى البسيطة منها.. اكتب بأي خط وأي لغة وأي ترتيب،  المهم تترجم فهمك السؤال إلى أفكار مرتبة.

كل هذي الأمور من جد راح تضمن لك درجة قوية بالكتابة لكن الفكرة انها تحتاج تدريب و ممارسة.. تدرّب على كل نقطة منها بقوة ومع الاستمرار والممارسة راح تلاحظ الفرق بنفسك.

إذا استفدت شارك هذا المقال 💛 

وإذا عندك اي سؤال ارسلي في تويتر من هنا