- تطوير مهارة القراءة

حيكون عندك مصدرين لتطوير مهارة القراءة في الدورة

المصدر الاول: روايات اكسفورد

السبب اللي خلاني اختار روايات اكسفورد تكون المصدر الأساسي في الدورة لتطوير مهارة القراءة أنه هي مرة ممتعة وأحداث القصة دايما حتجبرك تستمر في القراءة، كمان لانه الروايات بشكل عام حتساعدك تربط الخيال بالانجليزي وبالتالي تربط الكلمات بالخيال .. ويصير خيالك في الانجليزي اقوى والكلمات اللي تشوفها تفضل معاك لفترة أطول و تساعدك تستخدمها عمليا

المصدر الثاني: دروس التقوية السريعة للقراءة

فراح يكون عندك قطع اكاديمية مقسمة لفقرات، وكل فقرة ليها عنوان محدد عشان مخك يتعود على فكرة تحديد العناوين وتتعود على نمط الاختبار وتكون مناسبة لمستواك فما تتعقد لما تهجم على قطع الاختبار
لانه حتتعلم منها اهم الكلمات وحتدرب فيها على سرعة القراءة بطريقة هي الاولى من نوعها
ودا معناه سرعة قرائتك راح تزيد مع الوقت اللي هي اهم مهارة تحتاجها بالاختبار الحقيقي وحتطور استيعابك وحصيلتك اللغوية بشكل رهيب

- تكنيكات قسم القراءة

اول شيء حتعرف أهم تكنيكة لتقسيم الوقت اللي حتعلمك ازاي تقسم وقتك صح بالاختبار بناء على مستواك الحالي وتضمن انك حتوصل لاكبر عدد من الاجوبة صح في الوقت المحدد عندك اللي هو ٦٠ دقيقة يعني باختصار حشاركك التكنيكات اللي ساعدتني اجيب ٩ بالقراءة.

بعدها حنتكلم عن التكنيكة الاساسية للقراءة "تكنيكة حاد" وتعتمد على ثلاث خطوات اساسية اللي هي

• حاء: حدد عنوان لكل فقرة من فقرات القطعة اللي عندك
• ألف: اقرأ كل سؤال بتركيز وحدد الكلمات الدلالية
• دال: دور الاجابة للسؤال في المكان الصح بالقطعة

يعني حتطلع من هذي الدروس وانت عارف كيف تجاوب صح على اكبر عدد من الاسئلة بدون ما تجلس تقرأ كل كلمة في الفقرة، تحتاج بس تقرأ ممكن نسبة ٢٠ الى ٣٠٪ من كل القطعة 🤯

وفي الدورة حناخد هذي التكنيكة ونفصص كل خطوة من خطواتها وحشرحها ليك عمليا وحتدرب معايا عليها لدرجة انه حرفيا ما حتقدر تكمل الدرس اذا ما كنت فاهم ايش اللي قاعد اقوله، واذا سالتك وجاوبت غلط الدورة حترجعك تعيد اللي سمعته عشان تستوعب بنسبة ١٠٠٪ بعدها نكمل.

بس تستوعب فكرة التكنيكة حيكون عندك ٢٠ درس تفاعلي حتدرب معايا عملي على كل انواع اسئلة الاختبار يعني حتخلص الدروس وانت مختم دا القسم بإذن الله.

- التدريبات التفاعلية

مع كل مرحلة من مراحل تطبيق تكنيكة حاد حيكون عندك تدريب تفاعلي عشان تطبق اللي اتعلمته خطوة بخطوة وتتعود على اسئلة الاختبار وبالتالي ما حتعاني في اختبارك الفعلي

- الاختبارات التجريبية

في هذي المرحلة حتتدرب على قسم القراءة كامل، حتشوف كيف مستواك وايش نقاط ضعفك، حتراجع أخطائك بعد كل اختبار وتتعلم منها.

بعد ما تاخد جرعة قسم القراءة كاملة واللي تشمل التطوير، التكنيكات، التدرب حتكون جاهز تهكر اي اختبار قراءة يواجهك وتحت ضغط الوقت 

- تطوير مهارة الكتابة

نسبة كبيرة مننا فعليا تعاني من قسم الكتابة، ممكن لغتك كويسة وتقدر تتكلم بس ما تقدر تكتب او ما عندك افكار والعكس، فحاب ابشرك بأقوة أداة ذكاء اصطناعي "شكسبير AI" راح يساعدك تطور كتاباتك، يراجعها ليك ويطلع لك اخطاءك، يساعدك بطرق أفضل للتعبير ، حتلاقيه موجود في مسارك بشكل شبه يومي.

اذا عندك معرفة ولو بسيطة باختبار الايلتس اكيد تعرف انه اختبار الكتابة عبارة عن سؤالين عليك تجاوب عليهم خلال ٦٠ دقيقة، بمعايير تقييم محددة منها مثلا أنه تكمل عدد الكلمات المطلوبة في كل تاسك منهم.

فالدورة المكثفة للايلتس راح تاخدك خطوة بخطوة من البداية الين تشوف الدرجة اللي تبغاها في تقريرك اللي يوصلك من مصححين الدورة.

- تكنيكات قسم الكتابة

هنا حتعرف اهم التكنيكات اللي تساعدك تكتب ٤٠٠ كلمة في ٦٠ دقيقة، وحيكون عندك دروس تفاعلية لشرح كل جزء بالتفصييييل لتاسك ١ وتاسك ٢ ، وحتشوفني قدامك اطبق التكنيكات على كل أنواع الأسئلة اللي تيجي بالاختبار.

- التدريبات التفاعلية

وبعدها حيجي دورك تمسك ورقة وقلم وتطبق بنفسك معايا خطوة بخطوة على كل نوع كل اللي تعلمته عشان تقدر تتعود على الكتابة باستخدام التكنيكات وبالتالي يكون مرة سهل عليك الحل في الاختبار.

- الاختبارات التجريبية

في دا الجزء ما حتكون لوحدك، حتكتب وترسل كتاباتك لخبراء تصحيح وحيوصلك تقرير شامل عشان تعرف منه كم درجتك الفعلية، ايش اخطاءك، وكيف تتفادها وبالتالي تضمن درجة قوية بالاختبار الفعلي.

- التطوير

حيكون عندك دروس تطوير المحادثة في مسارك بشكل شبه يومي

الدروس مصممة بطريقة محاكاة تفاعلية 

اول شيء حيكون عندنا سؤال مثلا من الاسئلة المتوقعة للمحادثة، انا حقرأ السؤال واجاوبه بعدها حيكون دورك تفكر وتجاوب على نفس السؤال وبالتالي راح تكتسب كلمات وأفكار جديدة تساعدك تتكلم بشكل كويس وما تعلق.

- التكنيكات

• اول شيء حنتكلم عن كيف يجي اختبار المحادثة؟ عن نصايح عامة تسويها ولا تسويها هدفها تساعدك بشكل عام في الاختبار وكمان في الحياة اليومية.

• تكنيكات لكل قسم من الاقسام الثلاثة، طريقة اجابة القسم الأول "تكنيكة روم"،، طريقة اجابة القسم الثاني "تكنيكة الأزمنة الثلاثة"،، طريقة اجابة القسم الثالث وهكذاا حنتكلم عنهم بالتفصييل وتشوفني وانا قاعد اطبقها

• كمان حيكون عندك دروس فوكاب تشمل الكلمات الاساسية واللي تقدر تستعين بيها في كلامك.

• جمل إنقاذ تساعدك ما تعلق.

- التدريبات التفاعلية

صراحة دا الشيء الرهيب في الدورة انه حرفيا بعد شرح كل تكنيكة حيكون عندك تدريب تفاعلي عشان تطبق بشكل عملي وتعرف تجاوب بالطريقة الصح في الوقت، وبالتالي توصل لاعلى درجة ممكنة باقل مجهود من طرفك.

- الاختبارات التجريبية

الاختبارات التجريبية هنا هي الاسئلة المتوقعة للمحادثة قاعد اشاركها كل فترة على السوشيال ميديا، اكيد موجودة في الدورة ولكككن في الدورة ما حتكون بس اسئلة، حيكون عندك دروس تفاعلية خاصة بالأسئلة المتوقعة للمحادثة.
حتشوف اجوبة نموذجية لمختبرين المحادثة اللي معايا بالفريق، وفي بعض الاسئلة حسيبك تعتمد على نفسك لكن حيكون عندك أفكار تساعدك، وبالتالي حيكون عندك حصيلة لغوية جيدة جدا وافكار اكتر تساعدك تتكلم بدون ما تعلق.