تطوير مهارة الكتابة
تطوير اللغة

عبدالرحمن حجازي

مهارة الكتابة.. المهارة المنسية! في سنين دراستنا بالمدارس وبعض الكليات حتى ما كان في تركيز قوي على تطوير “مهارات اللغة” بشكل عام ومهارة الكتابة بشكل خاص.. كان أغلبنا تعتمد دراسته للغة على حفظ كلمات أو جرامر، مجرد الحفظ عشان تحل بالاختبار وتنجح فيه لكن معظمنا ما تعامل مع مهارة الكتابة من صغره على انها مهارة حياتية تفيدنا بشكل عام، وعشان كذا مهارة الكتابة تعتبر دائما هي الأضعف.

📌 والحل؟

اكتب! طبيعي يكون الحل عشان تتطور مهارة الكتابة انك تكتب يوميا وترا عادي انك تبدأ بأبسط المواضيع والكلمات .. المهم تبدأ تكتب وتستمر وراح تتطور مع الوقت.

⏱كم ساعة اكتب؟

بس ٥ دقائق يوميا 🤓 صح ٥ دقائق تحس انها مدة قليلة لكن اثرها على كتابتك رهيييب.. فقط استمر يوميا وراح تلاقي تطور مستواك من اول اسبوع

هذا الكلام مهو خيال بالعكس هذا من واقع تجارب حقيقية شوفتها قدام عيوني.. كثيرين بدأو بكتابة سطر او سطربن ومع الاستمرار صارت السطور صفحة كاملة في نفس الـ ٥ دقائق

ليش أهتم بتطوير مهارة الكتابة ⁉️ 

لانه اهتمامك بالكتابة الذاتية مو بس يطور مهارة الكتابة نفسها ويحسن أسلوبك وطريقة السرد ويزيد أفكارك، لكن كمان راح يحل أزمة الإملاء اللي معظمنا يعاني منها.. كل ما كتبت أكثر كل ما تطورت من ناحية الدقة والسرعة والأسلوب.. حتى لو كان مستواك مبتدئ، لا تستعجل ولا توقف.. استمر وراح تلاحظ التطور.

هل ضروري أحفظ كلمات وجرامر؟

أبداً.. لا تركز في بداية تدربك انه تكون كتابتك صحيحة ودقيقة لغويا ١٠٠% أو ان القواعد تكون على أكمل وجه، وإلا ما كان يحتاج تتدرب! كل اللي عليك تسويه انه تتعود على الكتابة بشكل صحيح.. أفكار مترابطة.. سرد صحيح.. بحيث يطلع الموضوع بالنهاية كامل ومرتب ومفهوم. ومع الوقت حتلاحظ تطور في السبيلنغ وفي الجرامر وحتى في تطور الأفكار وطريقتك في سرد المواضيع.

هل ضروري مدرس يصحح لي أخطائي؟

لا.. انت أصلا إذا بديت تكتب حتكون عارف أخطاءك بنسبة ٨٠٪؜.. وحيكون عندك احساس داخلي انه هذا السبلنغ غلط أو هذي القاعدة مكركبة.. كل اللي عليك تسويه انه تبحث في جوجل على القواعد اللي خبصت فيها.. أعرف ايش الصح وكمل.

.وكمان يمديك تستخدم هذا الموقع عشان يصحح كتابتك بشكل تلقائي وتعرف أهم الاخطاء اللي سويتها.. لكن لا تعتمد على المصحح التلقائي من بداية كتابتك عشان يمديك تعرف ايش الاخطاء اللي دائما تسويها وتتجنبها.

أكتب عن ايش؟

اكتب عن أي شيء يجي في ذهنك.. وعشان تضمن أفضل نتيجة جرب تقرأ موضوع معين وترجع تكتب عن نفس الموضوع كبداية،  وبعدها ابدأ انت بتوليد الأفكار من عندك واكتب عن اي موضوع حاب تكتب عنه المهم تكتب.. وكمان يمديك تستخدم مواقع تقترح عليك مواضيع تكتب عنها وهذا الموقع من البريتش كونسل راح يساعدك.

لسة ما أعرف أكتب!

هذا الشيء مرة طبيعي بالأول.. طبيعي بالبداية تقابلك شوي صعوبات لأنه لسة تسوي شيء جديد عليك منت متعود عليه.. لكن صدقني انت تحتاج بالكثير ١٠ دقائق يوميا.. مجرد ما ضغطت نفسك واستمريت بس شوي وقت وراح تبدأ تلاحظ التطور بنفسك وراح تتحمس وتكمل أكثر وتصير الكتابة هي المهارة الأسهل والأقوى عندك.

👨🏻‍🏫 اسأل مجرب

لا تحط عوائق وهمية قدامك وتقول لا الموضوع صعب وما راح يمديني اتطور.. كثيرين زيك بدأو من الصفر وتطورت كتابتهم مع الاستمرار على الكتابة الحرة.. وهذي بعض التجارب مع الكتابة.

كدا نكون خلصنا طرق تطوير مهارة الكتابة وباقي انك تبدأ فعليا من اليوم في التدرب… يلا شغل المؤقت قدامك وامسك القلم واكتب .. وفي المقال الجاي راح تعرف كيف تبدأ في تطوير مهارة المحادثة 

إذا استفدت شارك هذا المقال 💛 

وإذا عندك اي سؤال ارسلي في تويتر من هنا

دروس ثانية حتفيدك:

تطوير مهارة الاستماع

تطوير مهارة الاستماع

الإستماع.. طريقك المختصر لتطوير لغتك بالكامل! يب صح اللي قريته، الإستماع هو أول وأهم مهارة تركز عليها إذا تبغى تطور لغتك بأسرع وقت وتنتقل من مرحلة صفر في اللغة إلى مرحلة جداً متقدمة.. 🤓 ليش...

تطوير مهارة القراءة

تطوير مهارة القراءة

تطوير لغتك شيء ضروري سواء كنت مقرر تختبر ايلتس أو لا .. مين مننا دحين اللغة مهي شيء مهم في حياته؟ إذا ما كنت تحتاجها عشان اختبار أو سفر أو وظيفة فأنت تحتاجها عشان تفهم العالم حولك حرفيا وتتطور ذاتك...

تطوير مهارة المحادثة

تطوير مهارة المحادثة

المحادثة من المهارات المهمة بشكل عام وتحتاجها مو بس لاختبار الايلتس لكن كمان بحياتك اليومية.. دراستك.. عملك.. سفرك.. فرص كثيرة يمديك تحصلها إذا عندك هذي المهارة أو ممكن تروح عليك إذا ما كانت عندك....

0 تعليق