تطوير مهارة الاستماع
تطوير اللغة

عبدالرحمن حجازي

الإستماع.. طريقك المختصر لتطوير لغتك بالكامل!

يب صح اللي قريته، الإستماع هو أول وأهم مهارة تركز عليها إذا تبغى تطور لغتك بأسرع وقت وتنتقل من مرحلة صفر في اللغة إلى مرحلة جداً متقدمة..

🤓 ليش الاستماع؟

قبل ما اقولك ليش الاستماع.. خليني اسألك كيف تعلمت العربي وانت صغير؟

هل ابوك وامك اعطوك لستة كلمات تحفظها وأنت عمرك سنة عشان يمديك تتكلم؟

الاجابة اكيد لا،.. الإستماع كان هو المهارة اللي تعلمنا بيها لغتنا الأم.. من صغرنا ما تعلمنا الكلام واللغة بحفظ كلمات أو جرامر .. بس كنا نسمع الكلام من البيئة المحيطة،..

وشوية شوية صرت تحاول تقلد اللي تسمعه، الين وضحت عندك اللغة اللي نتكلم بيها وتمكنت منها واتقنتها بسبب الاستماع فقط .. وبالتالي إذا كنت ببيئة تتكلم عربي راح نتكلم عربي وإذا كنت ببيئة تتكلم إنجليزي أو اسباني أو ألماني أو أي لغة راح نتكلمها وهكذا..

نفس الفكرة راح تعتمدها في تطوير اللغة.. راح تعتمد بشكل كبير على مهارة الاستماع، وتسمع يوميا للبرامج الصوتية.. قد ما سمعت أكثر قد ما راح تطور لغتك بشكل رهيب لأنه مو بس راح تتعود على اللغة لكن كمان راح تتعود على اللهجة وتعرف مصطلحات أكثر، وأسلوبك وطريقة تفكيرك بالانجليزي يكونوا مرتبين أكثر.. وبعد فترة راح تلاحظ انه صرت تفهم الكلام بالانجلش وتستوعبه بدون ما يحتاج تترجم الكلام في مخك للعربي،

وإذا استمريت على عادة الإستماع ساعة واحدة يوميا بس اسبوعين متواصلين أنا أضمن لك بنسبة ١٠٠% انه راح تلاحظ تطور خرافي بمستواك في اللغة.. صرت تفهم أكثر.. تميز الكلام أسرع وهذا أهم شيء في اختبار الايلتس تحديدا انه تميز الكلام من المقاطع الصوتية اللي تسمعها.

انت مايمديك تطبق تكنيكات أو تحل أسئلة وتوصل لأكبر عدد من الإجابات الصحيحة إذا انت اصلا ما تميز ايش قاعد يقول! فالخطوة الأساسية وخطوتك الأولى لتطوير لغتك والاستعداد لاختبار الايلتس هي تمييز اللهجة وطريقة الكلام والتعود على الاستماع.

🎧 مصادر الاستماع

كثير منكم يحسب انه الاستماع للأفلام والأغاني الأجنبية راح تساعد بشكل كبير في تطوير مهارة الإستماع.. لكن هذا التوقع مهو صح، وهذي الطريقة ما راح تساعدك في تطوير لغتك بسرعة خاصة إذا كان هدفك الإستعداد لإختبار الايلتس،  لانه هذي المصادر لغتها عامية والايلتس يحتاج لغة أكاديمية.

وأفضل شيء يساعدك في تطوير مهاراتك في الإستماع هو الإستماع للبرامج الصوتية.. ودحين راح أشاركك أفضل ٥ برامج صوتية تختار منها اللي يناسب مستواك.

🐣 مصادر المستوى المبتدئ:

🐧 مصادر المستوى المتوسط:

🐎 مصادر المستوى فوق المتوسط:

أفضل طريقة لممارسة الإستماع:

اتفقنا انه راح تسمع من مصدر يكون مفهوم بالنسبة ليك بنسبة ٥٠ إلى ٧٠٪ يعني طبيعي راح تواجهك كلمات جديدة عليك تسمعها لأول مرة.. لكن هنا يجي السؤال: ايش أفضل طريقة تعتمدها في الإستماع للبرامج الصوتية؟

أهم شيء انك تسمع وتفهم الموضوع بشكل عام وتستوعب الكلام اللي قاعد تسمعه. . مرة ثانية، حاول انك ما تعتمد على قراءة الترجمة دائما ابدأ بانك ترجع تعيد المقطع مرة ثانية إذا فيه صعوبة وحاول انك تكون فاهم الموضوع بشكل عام.. فقط في حالة انك ما فهمت كلمة مهمة ترجمها وكمل.

لكن في حالة انه بديت تسمع وواجهت صعوبة.. بمعنى اخر ما تفهم أكثر من ٢٠٪ من الموضوع في هذي الحالة راح تعتمد على هذي الثلاث مراحل: 

1️⃣ اسمع .. اقرأ ..وترجم

راح تركز لمدة اسبوعين على الإستماع للبرامج الصوتية وانت شايف النص في نفس الوقت.. والكلمات الصعبة عليك تترجمها وتعرف معناها.

2️⃣ اسمع واقرأ

استمر لمدة اسبوعين كمان على الإستماع لنفس البرامج الصوتية وانت شايف النص بس خلاص لا تترجم وخلي تركيزك الأساسي على فهم الموضوع بشكل عام.

3️⃣ اسمع فقط

خلاص دحين مستواك تطور وصار يمديك تسمع فقط بدون استخدام عيونك.. ركز قد ما تقدر وخمن الكلمات الصعبة بدون ما توقف الصوت.. إذا  فاهم ٦٠٪ ممتاز واستمر أكثر لكن إذا لسة تحس بصعوبة يمديك ترجع للخطوة اللي قبلها.

وبكدا تكون عرفت كيف تطور مهارة الإستماع عندك سواء كنت تحتاج تطوره عشان الايلتس أو عشان تطور لغتك بشكل عام .. دورك دحين تبدأ تطبيق وتسمع من المستوى اللي يناسبك من المصادر الموجودة فوق.. وفي المقال الجاي بتعرف كيفية تطوير مهارة القراءة.

إذا استفدت شارك هذا المقال 💛 

وإذا عندك اي سؤال ارسلي في تويتر من هنا

دروس ثانية حتفيدك:

تطوير مهارة القراءة

تطوير مهارة القراءة

تطوير لغتك شيء ضروري سواء كنت مقرر تختبر ايلتس أو لا .. مين مننا دحين اللغة مهي شيء مهم في حياته؟ إذا ما كنت تحتاجها عشان اختبار أو سفر أو وظيفة فأنت تحتاجها عشان تفهم العالم حولك حرفيا وتتطور ذاتك...

تطوير مهارة الكتابة

تطوير مهارة الكتابة

مهارة الكتابة.. المهارة المنسية! في سنين دراستنا بالمدارس وبعض الكليات حتى ما كان في تركيز قوي على تطوير "مهارات اللغة" بشكل عام ومهارة الكتابة بشكل خاص.. كان أغلبنا تعتمد دراسته للغة على حفظ كلمات...

تطوير مهارة المحادثة

تطوير مهارة المحادثة

المحادثة من المهارات المهمة بشكل عام وتحتاجها مو بس لاختبار الايلتس لكن كمان بحياتك اليومية.. دراستك.. عملك.. سفرك.. فرص كثيرة يمديك تحصلها إذا عندك هذي المهارة أو ممكن تروح عليك إذا ما كانت عندك....

0 تعليق