لماذا لا تتحسن درجتك في الاختبارات التجريبية للايلتس؟
دليلك للمذاكرة

عبدالرحمن حجازي


التدرب على الاختبارات التجريبية عمود من الأعمدة الأساسية في مذاكرة الايلتس، وما يمديك تسحب عليها إذا تبغى تحقق هدفك وتوصل للدرجة.. لانه كثرة الحل من أهم عناصر استعدادك للاختبار والشيء اللي يساعدك تضاعف الدرجات والمستوى اللي وصلت له بعد مرحلة تطوير لغتك ودراستك للتكنيكات.

لكن البعض يلاحظ أنه الدرجات ثابتة وما يصير تطور.. بليز في هذي الحالة لا توقف وتحس بالإحباط.. العكس لازم تعرف ايش أسباب ثبات الدرجة وتبدأ تشتغل عليها وتجتهد أكثر عشان تتطور.

أسباب ثبات الدرجة:

عدم ارتفاع درجتك في التدريب على الاختبارات التجريبية له ٤ أسباب أساسية:

1️⃣ إهمال تطوير اللغة

احيانا مع مذاكرة الايلتس والتركيز على التكنيكات والاختبارات التجريبية.. والتركيز على الدرجة المطلوبة والهدف اللي ينتظرنا مع تحقيق الدرجة، ننسى أنه لغة ثابتة = مستوى ثابت وبالتالي عشان تحسن درجتك ومستواك بالايلتس ضروري تشتغل على تطوير لغتك بالتوازي مع مذاكرتك العادية للايلتس وحل الاختبارات.. عشان كدا مهم يكون في يومك هذي الساعة ثابتة للتطوير.

2️⃣ ما تحل كثير

كم اختبار حليت؟ اختبارين؟ ثلاثة؟ لسه دوبك بالأول لا تبدأ تقيم تطورك بعد اختبارين أو ثلاثة، لازم تستمر وتعطي وقت أطول للتدرب.. أنا أنصحك تتدرب على الأقل على ٧ اختبارات تجريبية.. ولا تنسى انه حل الاختبارات ماهو مجرد عدد قاعد تزيده وخلاص.. الاختبارات اللي تستفيد منها وتحسبها هي الاختبارات اللي صححتها وتعلمت من أخطائك فيها.

3️⃣ ما تستخدم التكنيكات

إذا فكرت انه اعتمادك على لغتك القوية يكفي وما يحتاج تستخدم التكنيكات أنت أكيد غلطان لأنه وقت الاختبار جدا ضيق.. حتى إذا شخص نيتف دخل اختبار الايلتس أكيد ما راح يوصل للدرجة ٩. لأنه ما تدرب على التكنيكات وكيف يوصل للإجابات الصح في أسرع وقت وكيف يتغلب على الوقت. ومن هنا لازم تتدرب بقوة على التكنيكات وتتمكن من استخدامها وهذا بالتدرب الكثير.

4️⃣ ما تصحح أخطاءك

الهدف من التدرب وحل الاختبارات التجريبية ماهو بس عدد قاعد تضيفه وتقول أنا حليت ١٠ اختبارات أو ١٥ اختبار، الهدف من الحل والتدرب انه تتعلم من أخطائك.. وبالتالي ضروري بعد كل اختبار تصحح أخطائك وتتعلم منها.. بانه تعرف ليش اجابتك غلط وايش كان عليك تنتبه له وايش مفروض تسويه في المرات الجاية، وبالتالي مع التدرب أكثر راح تقل الأخطاء وأكييييد راح ترتفع الدرجة باذن الله.

ومع انك تتجنب كل النقاط المذكورة بالأعلى ضروري تتغلب على نقطة ضعفك في اي قسم وما يكون عقبة قدامك:

اولا:
لا تحقد على هذا القسم وتجلس تذاكره  فقط طول الـ ٢٤ ساعة وتهمل باقي الأقسام.. النتيجة أنه صح احتمال كبير يرتفع مستواك بهذا القسم لكن للأسف راح ينزل بباقي الأقسام ويصير بالنهاية ما غيرنا شيء لأن الدرجة النهائية هي درجتك في الأربع أقسام.. واللي صار انه كانت نقطة ضعفك مثلا الاستماع انتقلت وصارت القراءة.

ثانيا:
اتفقنا انه درجة الايلتس تحسب على أساس درجتك في الأقسام الأربعة وبالتالي ضروري توزع وقتك وجهدك على كل الأقسام مع تركيز أكثر شوي على القسم اللي تفضله، هذي الطريقة تساعدك تجيب درجة أقوى وبالتالي راح تتأثر الدرجة الكلية بشكل إيجابي.

ثالثا:
تغلب على الصعوبات اللي تواجهك بأي قسم عن طريق تطوير المهارة + كثرة الحل، بمعنى إذا مثلا نقطة ضعفك بقسم الاستماع تغلب على هذي الصعوبة بتطوير مهارة الاستماع نفسها + حل اختبارات تجريبية أكثر على هذا القسم + مراجعة أخطاءك بتعمق بعد كل اختبار تسويه.

واخيرا:
لا تتحطم إذا حسيت بضعف بأحد الأقسام.. اتبع نصائح هذا المقال واستمر بقوة ولا تخلي أي عوائق تقف في تحقيق هدفك وخليك واثق انك قدها.

إذا استفدت شارك هذا المقال 💛 

وإذا عندك اي سؤال ارسلي في تويتر من هنا

دروس ثانية حتفيدك:

خطة مذاكرة الايلتس في ٧ ايام

خطة مذاكرة الايلتس في ٧ ايام

اذا باقي على اختبارك وقت مرة قليل زي مدة اسبوع لازم تستغل كل ثانية في وقتك صح عشان تحقق اعلى استفادة ممكنة وتستعد للاختبار بشكل رهيب.. اذا قررت تبدأ مذاكرة بشكل عشوائي راح تعاني من التوتر والتشتت...

خطة مذاكرة الايلتس في ٣ شهور

خطة مذاكرة الايلتس في ٣ شهور

من أهم أسباب استمرارك في المذاكرة وعدم تشتتك انه تكون ماشي على خطة محددة عارف فين وصلت وايش باقي ليك بالظبط.. وعشان كدا حبيت اساعدك تعرف كيف تقسم خطة مذاكرتك حسب وقتك.. إذا قررت يكون اختبارك بعد ٣...

0 تعليق