اختبار الايلتس مهو اختبار تختبره على الفاضي.. او ورقة تحطها في الدرج وخلصنا بالعكس هو اختبار مصيري ويتوقف عليه هدفك وطموحك ومستقبلك.. فطبيعي تكون متوتر هذا شيء طبيعي.. لكن مشكلة التوتر انه ممكن يخليك تخبص وتتلخبط على الرغم من قدرتك على الإجابة الصح وبالتالي يضيع جهدك، اتمنى ما اكون خوفتك اكثر وكمان دحين راح اقولك الحل..

1️⃣ توقع التوتر

شيء مرة طبيعي انه يجيك توتر خصوصا مع قرب موعد الاختبار.. توقع انه راح تتوتر وذكر نفسك انه هذا الشيء صار لكل اللي اختبرو ايلتس قبلك مو بس انت.. توقعك هذا راح يساعدك تسيطر على نفسك.

2️⃣ لا تحارب التوتر

تفكيرك المستمر في التوتر ومحاولتك محاربته داخليا راح يخرب عليك الموضوع أكثر ويخليك تتوتر زيادة! خليك طبيعي وحاول ما تلوم نفسك كثير ولا تخلي التوتر يتحكم فيك.. فقط خذ نفس عميق وحاول تكون هادي.

3️⃣ استخدم التوتر

تعرف انه يمديك تستخدم التوتر لصالحك! لا تستغرب خليني أوضح لك بمثال.. مثلا في اختبار المحادثة وانت متوتر يمديك تقول للمختبر I am sorry I am feeling so nervous right now, I can’t think in new ideas now. استخدامك لتعبير قوي زي كذا عشان تعبر عن نفسك يساعدك تجيب درجة أعلى مقارنة إذا كنت ساكت بسبب التوتر وما تقول شيء.

هذي الخطوات اللي فوق راح تساعدك تتعامل مع التوتر بشكل عام.. ودحين راح اقولك بعض النصائح الحياتية اللي راح تساعدك تؤدي اختبارك بأريحية أكثر.

☕️ روح الاختبار مصحصح ومركز

وقت اختبار الايلتس يعتبر إلى حد ما وقت طويل.. تجلس بقاعة الاختبار لأكثر من ساعتين ونصف بدون فواصل أو استراحة قاعد تكرف وتخرج أحسن ما عندك الين تحس انه خلاص مخك راح ينفجر من كثرة التركيز وطول الوقت.. وعشان تبدع بالاختبار ويمديك تركز مهم جدا تكون أخذت وقتك الكافي من النوم والراحة قبل الاختبار..

يعني لا تفكر انه إذا جلست للصباح تذاكر راح يفيدك هذا الشيء! العكس تماما.. هذا الشيء من اكبر الاخطاء اللي ممكن تسويها وراح يفقدك تركيزك اللي هو اهم شيء تحتاجه بالاختبار عشان كدا انصحك لا تذاكر ليلة الاختبار ونام على الأقل ٨ ساعات.. استيقظ في الموعد المناسب وخذ فطور رهيب واستعد بحماس وتوكل على الله.

👕 البس ملابس مريحة

في اختبار الايلتس منت مقيد بارتداء ملابس معينة أو زي رسمي.. وانصحك تختار ملابس مريحة تحبها عشان تكون مرتاح وأنت جالس فترة طويلة في الاختبار وتعطيك مظهر لائق بنفس الوقت.

🥤الماء

مسموح تدخل الاختبار بزجاجة الموية حقتك لكن بشرط تكون زجاجة شفافة وبدون ملصقات. لكن انصحك لا تشرب موية كثير قبل اختبارك عشان لا تضطر تروح الحمام (اعزكم الله) وتضيع من وقت اختبارك على الفاضي اللي هو أصلا وقت مرة ضيق.. لانه ممنوع تروح الحمام في الفاصل البسيط بين الأقسام.

⌚️ وقت الوصول

أغلب مراكز الاختبار تكون جدا صارمة في المواعيد واجراءات الدخول للاختبار.. عشان كدا ضروري قبل الاختبار يكون عندك خلفية فين مكان اختبارك ( لا تبحث عنه يوم الاختبار) وكم المدة اللازمة للوصول للمكان.. ومهم توصل للقاعة قبل موعد اختبارك بنص ساعة على الأقل.

✏️ ادواتك

لا تنسى تأخذ قلمك والمرسام والمساحة.. صح يوم الاختبار احتمال جدا كبير راح يعطوك أدوات لكن يفضل تأخذ اكثر من مرسام  احتياطا عشان لا تصير اي مفاجأت تعطلك عن الاختبار.. وكمان غير مسموح تدخل قاعة الاختبار بجوالك أو ساعة يد رقمية أو ذكية لكن لا تخاف.. موجود بقاعة الاختبار ساعة كبيرة عشان تكون متابع للوقت أول بأول.

🆔 بطاقة التسجيل

لا تنسى بطاقة الهوية او الجواز (حسب ما سجلت) لأنه بدونها ما راح يمديك تدخل الاختبار أصلا ويكون خلاص كدا راح عليك الموعد ما يمديك تعوضه في يوم ثاني.

👨🏻‍💼 تعليمات الاختبار

قبل بداية الاختبار راح يكون موجود شخص في القاعة يقول لك كل التعليمات المهمة اللي راح تحتاجها في الاختبار.. لا تشغل نفسك بأي شيء واسمع بتركيز للتعليمات.

إذا استفدت شارك هذا المقال 💛 

وإذا عندك اي سؤال ارسلي في تويتر من هنا