اختبار المحادثة عبارة عن مقابلة شخصية مع شخص نيتف لمدة ١٥ دقيقة.. فكرة انه تتكلم بالانجلش مع شخص اجنبي تخوف شويتين؟ صراحة انا كمان كنت زيك في البداية والحمدلله دحين درجتي ٨ في الايلتس.. وفي السطور الجاية راح اقولك حرفيا كل التفاصيل اللي تحتاجها وصدقني راح تدخل الاختبار وانت واثق في نفسك ومستعد بقوة.

📌 أقسام اختبار المحادثة

دائما اختبار المحادثة يكون في وقت منفصل عن الاختبار التحريري.. ممكن يكون هذا الوقت في نفس يوم الاختبار أو في خلال اسبوع قبل او بعد موعد الاختبار التحريري وتستمر مدة المقابلة الشخصية من ١٠ إلى ١٥ دقيقة توزع على ٣ أقسام 

القسم 1️⃣

قسم الاسئلة الشخصية.. هنا راح يسألك المختبر اسئلة شخصية عن نفسك زي اسمك، دراستك، هواياتك وهكذا.. راح يكون عدد الأسئلة هنا من ٥ الى ٨ اسئلة وعليك تجاوب كل سؤال في خلال ١٠ الى ١٥ ثانية..

مثال على القسم الاول

• What is your full name?
• How may I address you?
• Where are you living?
• How long have you been living there?
• What are the advantages of your hometown?
• Is there any swimming pool?
• Have you been to any swimming pool anywhere?

القسم 2️⃣

يعتبر الجزء الصعب في الاختبار.. لأنه مطلوب منك تتكلم بشكل متواصل لمدة دقيقة الى دقيقتين، راح يقولك المختبر سؤال رئيسي وتحته اسئلة فرعية ويعطيك ورقة وقلم عشان ترتب افكارك في خلال دقيقة وبعدها يطلب منك تجاوب على الأقل دقيقة كاملة.

مثال على القسم الثاني

Describe an area of your country you know and like

• Where is it?
• What are its special features?
• What do you and other people do in this area?
• Explain why you like it.

القسم 3️⃣

قسم الاسئلة النقاشية.. أسئلة هذا القسم دائما تكون مرتبطة باسئلة القسم الثاني، راح تكون اسئلة فلسفية نقاشية بنفس طريقة اسئلة القسم الأول بمعنى أنه المختبر يسأل وانت تجاوب مباشرة.. عدد الاسئلة هنا من ٣ الى ٤ اسئلة تحتاج تجاوب على كل سؤال إجابة مطولة من ٤٠ الى ٥٠ ثانية.

مثال على القسم الثالث

• What do you think of the historic place in the future?
• Will the government increase or decrease the safety guard?
• What are the changes to the local people and economy?
• What is the impact on the historic place by tourists?

✔️ تصحيح المحادثة

المختبر اللي راح يختبرك هو اللي راح يحدد درجتك في قسم المحادثة بناء على معايير تقييم اساسية ثابتة وواضحة.. عشان كدا دائما راح تلاقي اختبار المحادثة مسجل عشان جهة الايلتس نفسها يمديها تقييم المختبرين كل فترة للتأكد من التزامهم بمعايير التصحيح، وكمان في حالات طلب إعادة التصحيح راح يتم تقييم تسجيل اجابتك مرة ثانية.

🤸🏻‍♀️ معايير التقييم

في اختبار المحادثة ما راح يكون المختبر شخص صلب.. العكس راح يحاول انه يكون لطيف ويكسر توتر، وراح يقيمك درجتك بناء على ٤ معايير أساسية.

١- الطلاقة:

اختبار الايلتس يركز على تقييم مهاراتك وبالتالي طبيعي تكون الطلاقة من المعايير المهمة لتقييمك في المحادثة.. المختبر يبغى يشوف الشخص يتكلم بسرعة معقولة وسلاسة وبدون ما يعلق كثير.. وعشان يمديك تحقق هذا المعيار تحتاج تسمع كثير وتدرب على المحادثة الذاتية.

٢- النطق:

الايلتس اختبار عالمي ومتفهم أنه طبيعي يكون في اختلاف في اللهجات وبالتالي لا يحاسبك ابدا على لهجتك ومهو مطلوب منك تتكلم زي الشخص النيتف لكن الشيء الجوهري اللي يتم تقييمك على اساسة هو نطقك الصحيح للكلمات.. بمعنى أنه إذا نطقت كلمة know كنو بدل نو راح يتأثر عندك معيار النطق.. انصحك تستخدم هذا الموقع لمعرفة النطق الصحيح لاي كلمة.

٣- الجرامر:

استخدام زمن خطأ وانت تجاوب على الاسئلة من أكثر المشاكل شائعة الحدوث في اختبار المحادثة، دائما حاول تكون مركز ولا تستخدم مثلا زمن المضارع وانت تتكلم عن شيء صار في الماضي وتكنيكة الأزمنة الثلاثة راح تساعدك في هذا المعيار.. ولا تنسى انه استخدام كلمات الربط و الموازنة بين استخدام جرامر قوي وصحيح من الأشياء المهمة هنا.

٤- الكلمات:

ممنوع تماما في اختبار المحادثة تستخدم كلمات عامية او slang words.. لازم تستخدم كلمات أكاديمية وكمان حاول لا تستخدم الكلمات السهلة الشائعة دائما حاول استخدم مرادفات قوية حتساعدك ترفع درجتك.. حتلاقي هذي الكلمات اللي تحتاجها في مقال اهم كلمات المحادثة.

💡نصائح مهمة

يوم اختبار المحادثة طبيعي تكون متوتر شوي لانه راح تتكلم قدام المختبر مباشرة مهو زي الاختبار التحريري المعلومات في ذهنك وبس تعبر عنها على ورق.. ومعرفتك ايش حيصير بالضبط يوم اختبارك وايش الأشياء اللي تسويها والأشياء اللي تتجنبها راح تساعدك تتغلب على توترك.

أولا:” سوي” ✅

دحين راح أقولك نصائح مهم تسويها حتساعدك بقوة في الاختبار

👨🏻‍🏫 خليك مؤلف

في الاختبار ما ينفع تقول ما صار لي موقف زي كدا.. عادي تألف اجابة وتخترع مواقف وأحداث طبعا متعلقة بموضوع السؤال لكن مهو مطلوب يكون كلامك حقيقي ١٠٠٪

🙅🏻‍♂️ استخدم لغة الجسد

هذا الاختبار عبارة عن مقابلة شخصية ومهم تعطي للمختبر انطباع أنك شخص واثق بنفسك عشان كدا استخدامك للغة الجسد زي استخدام يدك وتغيير نبرة صوتك وانت تجاوب راح يساعدك توصل المعلومة بشكل اسرع واوضح وافضل.

🤓 خليك مركز

الايلتس ماهو منهج تذاكره وتدخل تلاقيه في الاختبار لكن هو اختبار يعتمد بشكل اساسي على ادائك يوم الاختبار نفسه خاصة في قسم المحادثة عشان كدا مهم تنام على الاقل ٨ ساعات ليلة الاختبار وتاخذ فطور كويس يوم الاختبار وتروح مركز ومصحصح.

⏱ تدرب على المؤقت

لازم تجاوب كل سؤال في خلال الوقت المحدد وما يمديك تدخل بساعة في الاختبار عشان تراقب الوقت.. وبالتالي التدرب على الإجابة باستخدام المؤقت جدا مهم ومع الاستمرار راح يمديك تحس قد ايش تكلمت ومتى انتهى الوقت.

🔁 إعادة الصياغة

في اسئلة القسم الثالث يمديك تعيد صياغة السؤال في بداية إجابتك عشان تكسب شوية وقت تفكر في اجابة السؤال أكثر، وهذا أفضل من انه تجلس في لحظات صمت عشان تفكر في السؤال.

ثانيا” لا تسوي” ❌

ودحين راح أقولك الأشياء اللي عليك تتجنبها تماما في اختبارك

🏃🏻‍♂️ لا تتأخر

روح قبل موعد اختبارك بـ ١٥ دقيقة على الأقل.. لأنه اذا وصلت على الموعد بالضبط راح تكون متوتر واذا وصلت متأخر ممكن يتم إلغاء اختبارك.

🆔 لا تنسى هويتك

لازم يوم الاختبار يكون موجود معاك الهوية نفس اللي سجلتها وانت تحجز اختبارك، لأنه بدونها ما راح يمديك تختبر حتى ولو معاك هوية ثانية.. واذا صار اي ظرف وبسببه ما راح تكون معاك الهوية اللي سجلتها يوم الاختبار لازم تتصل بالمركز وتطلب منهم تغيير الهوية للهوية اللي راح تكون متاحة معاك يوم الاختبار.

😑 لا تجاوب بـ Yes/ No

المختبر يبغى يشوف مدى طلاقتك في الكلام.. عشان كدا ممنوع تجاوب حتى في القسم الاول بـ yes or no فقط وتوقف.. لازم تكمل كلامك على الاقل ١٠ ثواني, مثلا اذا سألك ?where is your hometown

ايش الاجابة الافضل برأيك؟

• My hometown is Jeddah.
• My hometown is Jeddah. Jeddah is a Saudi province in Makkah. It is located in the west of the kingdom. Nickname of Jeddah is the pride of the Red Sea and it is the economic and tourism capital of the Saudi Arabia.

⌛️ لا تطول في الاجابة

المختبر يكون عنده وقت محدد لكل قسم وبالتالي اذا طولت في الاجابة مرة راح يقطعك المختبر وانت لسة ما جاوبت على السؤال بشكل كامل وراح تخسر درجات على الفاضي.

😶 لا تكون صامت

طبيعي في اختبار المحادثة المختبر يسألك اسئلة ما سمعت عنها ولا حتى فكرت فيها بالعربي وفي نفس الوقت ما يمديك تتجمد ولا تجاوب على السؤال.. هنا استخدم روح المؤلف واخترع حرفيا أي اجابة حتى ولو مهي حقيقية.

🤐 لا تتكلم مع احد

وانت منتظر يجي دورك لأداء الاختبار راح تلاقي ناس كثير حوالينك يتكلمو.. بليز لا تشارك في هذي الأحاديث لأنه في معظم الأحيان يكون الكلام سلبي ويتسبب انه تتوتر وتخبص في الاختبار.

🙌🏻 لا تراجع

دقائق الانتظار قبل الاختبار لا تراجع خلالها أي شيء افضل انه تركز هذا الوقت على الدعاء وقراءة القرآن عشان تكون مطمئن وهادي.

إذا استفدت شارك هذا المقال 💛 

وإذا عندك اي سؤال ارسلي في تويتر من هنا