دليلك لقسم القراءة في اختبار الايلتس
قسم القراءة

عبدالرحمن حجازي

قسم القراءة في اختبار الايلتس هو ثاني قسم راح تختبره في الاختبار التحريري بعد الاستماع.. راح يكون عندك ٣ قطع طويلة أكاديمية وعلى كل قطعة يعطيك مجموعة من الأسئلة بين ١٣ إلى ١٤ سؤال بحيث يكون مجموع الأسئلة ٤٠ سؤال تجاوبهم خلال ٦٠ دقيقة فقط.

وممكن تيجي الفقرات في هذي القطع مقسمة بالأحرف زي كدا 👇🏻

او تيجي فقرات فقط بدون ترقيم كل فقرة بحرف زي كدا 👇🏻

ودرجتك في القراءة تحسب بناء على مجموع أجوبتك الصح اللي جبتها من الـ ٤٠ سؤال بناء على هذا الجدول

بمعنى انه اذا جاوبت على ٢٧ سؤال صح من ٤٠ حتكون درجتك ٦.٥ في قسم القراءة.. وقد ما ارتفعت عدد اجوبتك الصح قد ما ارتفعت درجتك.

وهذي القطع الثلاث تكون متدرجة في الصعوبة من الاسهل للاصعب من حيث التراكيب اللغوية وسهولة إيجاد واستنباط المعلومات.. بمعنى انه القطعة الاولى تكون الكلمات المستخدمة فيها أبسط من الكلمات في القطعة الثالثة وكمان ما في اجوبة كثير تكون اجابتها بين السطور، وبالتالي راح يمديك توصل للإجابة اسرع لكن احيانا يكون موضوع القطعة الثالثة “الأصعب” يكون عندك خلفية عنه أو في مجال اهتمامك وبالتالي ما راح تحس بصعوبة هذي القطعة بالعكس حتكون هي الاسهل بالنسبة لك بناء على خلفيتك السابقة عن الموضوع.

ومن هنا يجي الحديث عن الخطوة الصفرية.. اللي هي باختصار قراءة عناوين القطع.. جدا مهم قبل ما تبدأ تجاوب أي قطعة تقرأ العنوان وتخمن عن ايش راح يكون موضوع القطعة، إذا لقيت قطعة عندك خلفية عن موضوعها ابدأ جاوبها اول شيء بمعنى تعامل معها على أنه هذي هي القطعة الأولى.

لا تنسى انه في اختبار القراءة ما في وقت زيادة لنقل الأجوبة من ورقة الأسئلة لورقة الإجابة زي اختبار الاستماع عشان كدا افضل شيء تسويه انه بعد ما تجاوب كل نوع سؤال انقل الإجابة مباشرة.. بمعنى انه خلصت اجابة أسئلة الصح والخطأ قبل ما تروح تجاوب نوع السؤال اللي بعده انقل هذي الأجوبة لأنه إذا نقلت اجابة سؤال سؤال راح تشتت وتضيع وقت.. وإذا نقلت كل الأجوبة في نهاية الاختبار احتمال جدا كبير راح تتلخبط أو يخلص الوقت وأنت لسة ما نقلت كل أجوبتك وتكون صدمة بالنسبة ليك.

🔠 أنواع أسئلة اختبار القراءة

الهدف من اختبار الايلتس انه يقيم مهاراتك في اللغة الانجليزية بدقة .. وبالتالي ما حيكون اختبار القراءة سهل وبسيط ويتنوع في الأسئلة بشكل كبير، تقريبا اكثر من ١٠ أنواع مختلفة للأسئلة

🔄 أسئلة تتكرر كل اختبار

هذي الأنواع من الأسئلة لازم تواجهك كل اختبار.. تعتبر من أنواع الأسئله الأساسية في اختبار القراءة اللي تجي في معظم القطع.

١- الصح والخطأ وغير الوارد:

في هذي الأسئلة يعطيك جملة ويطلب منك حسب المعلومات الموجودة بالقطعة تحدد إذا كانت الجملة صح أو خطأ أو ما وردت بالقطعة.. هنا عليك تقرأ السؤال كويس وتحدد الكلمات الدلالية.. وبعدها طابق المعلومات اللي في السؤال مع القطعة.. إذا كل المعلومات في السؤال موجودة ومتطابقة مع المعلومات الموجودة بالقطعة راح تكون الإجابة صح..

مثال:

Q: Children with good self control are known to be likely to do well at school later on.

If playful experiences do facilitate this aspect of development, say the researchers, it could be extremely significant for educational practices, because the ability to self-regulate has been shown to be a key predictor of academic performance.

هنا لقينا الكلمات المهمة في الفقرة ويقول انه القدرة على ضبط النفس self regulate واللي هي بنفس معنى self control تعتبر مؤشر توقع للأداء الأكاديمي أو التعليمي. Academic performance واللي مقصود فيها المدرسة واستخدم كلمة predictor يعني مؤشر توقع ويدل على أنه الشيء راح يصير later وبالتالي راح تكون الاجابة TRUE

وإذا كانت معلومات السؤال كلها موجودة لكن فيه تناقض بين هذي المعلومات وبين المعلومات الموجودة في القطعة تكون الإجابة غلط.

Q: Children had problems thinking up ideas when they first created the story with LEGO.

Children wrote longer and better-structured stories when they first played with dolls representing characters in the story. In the latest study, children first created their story with Lego, with similar results. Many teachers commented that they had always previously had children saying they didn’t know what to write about. With the Lego building, however, not a single child said this through the whole year of the project.

في الفقرة يقول انه الأطفال كتبوا قصص أطول وأفضل wrote longer and better-structured stories لما استخدموا الدمى ونفس النتائج حصلت لما استخدموا الليغو لأول مرة children first created their story with Lego, with similar results وأنه المدرسين قالوا انه الأطفال كانوا يشتكوا من انهم ما يعرفوا عن شو يكتبوا didn’t know what to ..write about ولكن بعد استخدام الليغو ما حد اشتكى أبداً. not a single child said this وكده يكون الجواب انهم الأطفال ما واجهوا مشاكل ويكون FALSE

أما إذا في معلومة حتى ولو بسيطة تم ذكرها في السؤال لكن ما ذكرت في القطعة أصلا تكون الإجابة غير وارد (not given)

Q: Playing with dolls was found to benefit girls’ writing more than boys’ writing

Whitebeard’s recent research has involved developing a play-based approach to supporting children’s writing. Many primary school children find writing difficult, but we showed in a previous study that a playful stimulus was far more effective than an instructional one. Children wrote longer and better-structured stories when they first played with dolls representing characters in the story. In the latest study, children first created their story with Lego, with similar results. Many teachers commented that they had always previously had children saying they didn’t know what to write about. With the Lego building, however, not a single child said this through the whole year of the project.

هنا أتكلم عن انه اللعب بالدمى حسن كتابة الأطفال ولكن ما تكلم عن أي مقارنة بين الأولاد والبنات وكده نعرف انه الجواب هنا NOT GIVEN

ملاحظة:

في شي مهم انتبه له بهذا القسم إذا كان المطلوب برأس السؤال YES OR NO التزم حرفيا بالكلمة المطلوبة .. لأنه إذا جاوبت TRUE بدل YES حتحسب اجابتك غلط.

٢- الفراغات:

هي عبارة عن جملة ينقصها كلمة أو كلمتين وعليك تكمل هذي الجملة بالكلمة الناقصة من القطعة.. وأهم خطوة لازم تسويها في هذي الأسئلة هي قراءة التعليمات.. عشان تعرف مسموح تكتب كم كلمة في الفراغ لانه إذا كتبت كلمة زيادة راح تحسب اجابتك غلط.. مثلا إذا كان مطلوب منك تكتب كلمة واحدة وانت كتبت الاجابة the book راح تكون اجابتك غلط.

بعد قراءة التعليمات اقرأ السؤال بتركيز وخمن من فهمك ايش ممكن يكون نوع الكلمة المطلوب تكتبها في الفراغ.. هل هي مثلاً اسم أو مكان أو فعل.. وفي هذي الأسئلة اكتب الإجابة مباشرة في ورقة الإجابة وحط علامة صح عند الفراغ في ورقة الأسئلة.

٣- الاختيارات:

الاختيارات إلى حد كبير تشبه اسئلة الفراغات بل أسهل شوي لأنه يحدد لك الإجابة بين عدة اختيارات تختار منها.. وهنا عليك تقرأ الإختيارات بتركيز واستبعد أولا الاختيارات اللي منطقيا مرة ما تمشي مع السؤال.. عشان تقلل على نفسك التشتت وتركز في عدد اختيارات أقل وبالتالي توصل أسرع للاختيار الصح

🔚 أسئلة لا تتكرر كل اختبار:

هذي الأسئلة ما تجي كل اختبار هي تتكرر بنسبة ٣٠ الى ٤٠٪ تقريبا.. يعني ممكن يجي اختبار بدون نوع سؤال من هذي الأسئلة..

١- تحديد العناوين:

في هذا السؤال لا تختار عنوان لجزء من الفقرة لازم تحط عنوان يشمل كل الفقرة.. وعشان يمديك تجيبها صح اقرأ أول واخر جملة من كل فقرة عشان يمديك تخمن ايش فكرتها بالكامل وبالتالي يمديك تختار العنوان اللي يشمل فكرة الفقرة بالكامل. لكن مرة ثانية “لا تنسى قراءة التعليمات” لانه أحيانا يقول في التعليمات انه ممكن تختار نفس العنوان لأكثر من فقرة.. ومرات ثانية يقول انه العناوين أكثر من الفقرات وبالتالي فيه عناوين ما راح تستخدمها.

٢- اختيار اسم العالم:

هنا راح يعطيك جمل وانت عليك تحدد مين قال هذي الجمل أو مين صاحب هذي الأفكار من القطعة..وهذي الاسئلة على عكس توقعاتك تعتبر من أسهل أنواع الأسئلة لانه اسم العالم طبيعي حيكون مكتوب بالحروف الكابيتال في القطعة.. وبالتالي عيونك تروح عليه بسرعة وتوصل لمكان الاجابة في القطعة أسرع.

٣- الدايجرام:

هو سؤال فراغات لكن لأنه الفراغات تكون وسط رسمة كثير منكم يخاف منها ويفكر انه هذا سؤال مرعب لكن بالحقيقة هي نفس طريقة حل اسئلة الفراغات.. حتشوف الرسم وتخمن ايش ممكن يكون الفراغ.. وبعدها تبحث عن الإجابة في القطعة..

٤- اختيار المعلومة:

هنا يجيب لك معلومات ويطلب منك تختار تم ذكر هذي المعلومة في أي فقرة، وفي هذي الأسئلة ممكن يكون ذكر أكثر من معلومة في نفس الفقرة وبالتالي ممكن تكون إجابة سؤالين هي نفسها. 

٥- الماتشنج:

في هذي الأسئلة راح يكون عليك تسوي ماتشنج بين المعلومات اللي موجودة في السؤال والمعلومات اللي تم ذكرها في القطعة.. وتكنيكة حاد راح تسهل عليك حل هذا السؤال.

دحين خلاص صار عندك خلفية قوية عن أنواع الأسئلة.. ومهم تبدأ تدرب بنفسك على الاختبارات التجريبية عشان تطبق اللي تعلمته وتكون مستعد لأي نوع سؤال يواجهك.. اهجم على هذا الموقع ويلا ابدأ من اليوم.

😬 صعوبة قسم القراءة

أول صعوبة حتواجهك هي الوقت.. لانه الوقت في قسم القراءة مرة محدود بالنسبة لطول القطع وصعوبة الكلمات المستخدمة وعدد الأسئلة .. عشان كدا كل ثانية مهمة في هذا الاختبار وما ينفع تحل ابدا بشكل عشوائي، لازم تعتمد على تكنيكة تقسيم الوقت.

شوف هذا الانفوجرافيك بيوضح لك كيف تقسم وقتك حسب مستواك 👇🏻

والشيء الثاني هو صعوبة القطع نفسها لان القطع اغلبها حيكون كلمات أكاديمية وكلمات ممكن أول مرة حتشوفها بحياتك.. لكن المفاجأة انه ما راح تقرأ كل القطعة وبالتالي ما تحتاج تفهم كل كلمة في اختبار القراءة.. جدا جدا طبيعي تواجهك كلمات جديدة مهما كان مستواك متقدم والحل حتلاقيه في تكنيكة حاد.

شوف هذا الانفوجرافيك بيوضح لك بشكل عام ايش هي تكنيكة حاد.. ولشرح التكنيكة بالتفصيل اضغط هنا..

قسم القراءة صح صعب لكن مع التكنيكات والتدرب ممكن يصير افضل قسم بالنسبة ليك.. ودحين راح اعطيك شوية نصائح عامة او اهم الأشياء اللي تسويها والاشياء اللي عليك تتجنبها في هذا القسم.

أولا: سوّي ✅

٦ نصائح ممكن تحسها بسيطة او بديهية، لكن اذا سويتها ممكن تساعدك ترفع درجتك نص درجة على الأقل.

🤓 قراءة التعليمات

لا تبدأ تجاوب ابدااا بدون ما تقرأ التعليمات حقت السؤال.. لانها جدا مهمة اولا عشان تفهم ايش المطلوب من السؤال، كمان تعرف عدد الكلمات المسموح تكتبها كاجابة.. مثلا اذا قالك لا تكتب اكتر من كلمة وكانت الاجابة laboratory وانت كتبت الاجابة a laboratory راح تحسب اجابتك غلط..

🔠 الكابيتال والسمول

في كل الاختبار لازم تنتبه مرة للكابيتال والسمول وما تلخبط بينهم .. خاصة في قسم الاستماع والقراءة إذا ما انتبهت لهم راح تحسب اجابة السؤال كامل غلط .

📝 نقل الإجابة

في قسم القراءة انقل اجابة كل نوع سؤال تخلصه وركز مرة انه تنقل الاجابة في المكان الصح يعني اجابة السؤال رقم ١٠ لازم تكون في الفراغ العاشر في ورقة الأجوبة.. لكن في سؤال الفراغات حط علامة ؟ في ورقة الأسئلة واكتب الإجابة مباشرة في ورقة الأجوبة…

☠️ انتبه لنوع السؤال

في القراءة ممكن يجي سؤال صح وخطأ بصيغتين.. ممكن يكون yes or no.. او true or false في هذي الحالة لازم تكون اجابتك زي السؤال بالزبط.. اذا كتبت true والاجابة yes راح تحسب اجابتك غلط

✍🏻 عبي الاجوبة

طبيعي راح يكون عندك أسئلة ما عرفت إجابتها.. لكن في نفس الوقت لا تترك اي فراغ في ورقة الأجوبة فاضي.. خمن اي اجابة واكتبها في الفراغ.

✏️ استخدم المرسام

استخدم المرسام أفضل من الحبر .. راح يخلي شكل الورقة مرتب وإذا صارت اي لخبطة يمديك تصححها بدون شخمطة.

ثانيا: لا تسوي

ودحين راح تعرف الأشياء اللي عليك تتجنبها تماما في اختبارك.

🕑 تكنيكة الدقيقتين

لا تعطي اي سؤال مهما كان أكثر من دقيقتين.. طبيعي راح تحس انه أنت خلاص قريب من الإجابة وتضيع وقتك وأنت تحقد على سؤال واحد.. بليز لا تسويها إذا ما عرفت اجابة السؤال كمل اللي بعده وارجع له في النهاية

👀 لا تقرأ كل حاجة

اتفقنا من قبل انه ما راح تقرأ كل القطعة.. واذا حاولت تسويها وبدأت تقرأ وتحاول تفهم كل كلمة راح تنخسف درجتك ما راح تستفيد فقط ركز على تطبيق التكنيكات.

⏳ لا تضيع وقتك

في اختبار الايلتس حرفيا كل ثانية مهمة .. بليز لا تترك الاختبار وتطلع للحمام اعزكم الله.. لانه الوقت مرة ضيق وما راح يكون فيه مساحة لأي شيء تسويه غير انك تجاوب الأسئلة.

إذا استفدت شارك هذا المقال 💛 

وإذا عندك اي سؤال ارسلي في تويتر من هنا

دروس ثانية حتفيدك:

0 تعليق