المحادثة من المهارات المهمة بشكل عام وتحتاجها مو بس لاختبار الايلتس لكن كمان بحياتك اليومية.. دراستك.. عملك.. سفرك.. فرص كثيرة يمديك تحصلها إذا عندك هذي المهارة أو ممكن تروح عليك إذا ما كانت عندك.
المهارات الثلاثة الثانية الاستماع والقراءة والكتابة تكون أنت الطرف الوحيد فيها، انت بس تسمع أو تقرأ أو تكتب.. أما مهارة المحادثة هي المهارة الوحيدة اللي تكون فيها طرف ضمن طرفين أو أكثر.. ومن هنا تيجي صعوبة هذا القسم عند الكثيرين بسبب الرهبة!
المشكلة الأساسية في المحادثة:
المشكلة باختصار هي عدم الممارسة بسبب الخوف.. دائما تتجنب انه تتكلم أمام أحد يكون بسبب انه تخاف تغلط أو ما تنطق صح ومليون شغلة تفكر فيها تأثر عليك وتقف في طريق تقدمك.. ومن هنا حاب أعطيك أول نصيحة لتطوير مهارة المحادثة وهي: لا تخاف!!
لا تخاف تتكلم أو تمارس اللغة في أي مناسبة أو أي فرصة تلاقيها.. العكس هذي تكون من أهم ألأشياء اللي تساعدك تتطور وتزيد طلاقتك أضعاف! اهجم بقوة واستغل أي فرصة يمديك تتكلم فيها.. سواء كنت في مطعم او الجامعة او اي مكان يمديك تمارس فيه اللغة اتكلم ولا تتجنب المحادثات.. مافي أحد يقيمك أو يعطيك درجات أو اصلا يهتم لدرجة اتقانك للهجة والنطق.. بالعكس انت المستفيد الوحيد.
هل أحتاج أسافر للخارج عشان أطور المحادثة عندي؟
كلامك صح لكن قبل ٥٠ سنة… زمان قبل اختراع النت كان عشان تمارس اللغة تسافر وتمارسها مع أهل اللغة الأصليين .. لكن دحين كل اللي تحتاجه جوالك او لابتوبك وسماعة وراح يمديك تسمع اللغة وتمارسها من اصحاب اللغة الاصليين وانت في مكانك.
والمصادر اللي تستخدمها وتخليك تطور لغتك اجمالا ومنها المحادثة موجودة ومتاحة في كل مكان يمديك وبكل سهولة تبدأ فورا وانت في غرفتك.. فقط تحتاج تبدأ وتستمر!
كيف أطور مهارة التحدث؟
المحادثة عبارة عن مهارة إخراج.. عشان كدا تطوير هذي المهارة يعتمد على خطوتين:
1️⃣ ممارسة الإستماع
اتفقنا انه المحادثة مهارة إخراج ومهارة الإدخال المقابلة لها هي مهارة الاستماع.. المحادثة مرتبطة بشكل كبير بالاستماع كل ما سمعت اكثر تلقائيا راح تتطور في المحادثة أكثر.. لانه تكون متعود على الانجليزي ومخك تلقائيا يفكر بالانجليزي ..
وبالتالي يترجم مخك هذا التفكير لكلام بدون ما تحتاج تترجم كل كلمة قبل ما تنطقها وهذا اكثر شيء يساعدك في زيادة طلاقتك.. وتتعود على النطق الصحيح وتتعود على اللهجة الصح زي وانت صغير تعلمت تنطق العربي صح بسبب انه تسمع كثير لكل اللي حوالينك.. يعني باختصار الاستماع هو الطريق الغير مباشر لتطوير مهارة المحادثة.
2️⃣ ممارسة المحادثة:
الممارسة تعني ان تتكلم كثير.. تكلم في أي فرصة قد ما تقدر وفي أقرب مناسبة.. خصص وقت يومي لممارسة هذي المهارة تكلم فيها مع نفسك لمدة ٥ الى ١٠ دقائق يوميا. تكلم عن أي موضوع او اي شي يجي في ذهنك مثلا
- كيف كان يومك
- عن اسرتك
- عن صديقك المفضل
- عن بلد تتمنى تروحها
- عن وظيفة أحلامك
- أو اسأل نفسك سؤال مطول وابدأ جاوب عنه
حرفيا تكلم عن اي حاجة المهم انه تبدأ في الممارسة ولا يهمك من أخطاءك في البداية.. طبيعي راح يكون عندك اخطاء في الجرامر ومخك يعلق شوي في البداية لكن مع الاستمرارية راح تقل الأخطاء وتزيد طلاقتك بشكل ملحوظ.. لكن انصحك إذا في كلمة منت متأكد كيف يتم نطقها اضغط هنا هذا الموقع راح يساعدك تعرف النطق الصح لاي كلمة.. جدا مهم تسويها لانه هذي من معايير تقييمك في اختبار المحادثة.
والشيء المهم هنا اللي عليك تراعيه الاستمرارية.. اللسان عبارة عن عضلة عشان يمديك تنطلق لازم تتمرن يوميا ما ينفع تبدأ يومين وتوقف وتتوقع انه راح تصير حريف في اللغة.. استمر يوميا واعرف ايش نقاط الضعف عندك واشتغل عليها اكثر
وكمان الاستمرارية راح تخليك تتحمس اكثر وانت قاعد تتابع تطوراتك يوم بعد يوم راح تتحمس تكمل أقوى.. المحادثة مهارة حياتية مهمة لا تأجل تطويرها أكثر ولا تخلي أي شيء يقف بطريق تقدمك وابدأ من اليوم.
وهذا الرابط راح يساعدك تدرب يومياً.. يعطيك موضوعات تسمعها وبعدها يحدد لك مهمة تتكلم عنها ويقولك ايش الزمن اللي يفضل تستخدمه عشان تمارس مهارة المحادثة بشكل واقعي 🙌🏻
واخيرا خلصنا تطوير المهارات الاربعة.. نروح دحين لأساسيات اختبار الايلتس في المقال الجاي.
إذا استفدت شارك هذا المقال 💛
وإذا عندك اي سؤال ارسلي في تويتر من هنا
0 تعليق