عشان تستعد لاختبار الايلتس عندك اختيارين..
الاختيار 1️⃣: تستعد في سنين!
الاختيار 2️⃣: أنه تختصر على نفسك الوقت..المجهود.. والتشتت، وتستعد لاختبارك في خلال شهور بدل سنوات..
كيف تستعد في شهور؟
المفتاح انك تعرف ايش بالضبط العناصر اللي لازم تغطيها أثناء استعدادك للايلتس .. بمعنى آخر لا تكون مشتت ومنت عارف ايش راح تذاكر بالضبط وتضيع وقتك.. ضروري تكون عارف ايش تذاكر وايش تركز عليه.
الايلتس قائم على ٣ أعمدة إذا ركزت عليها ووزعت عليها وقتك ومجهودك إن شاء الله راح توصل لأفضل نتيجة في أقصر وقت.
ايش هي الأعمدة الثلاثة؟
- المهارات
- التكنيكات
- الممارسة
🙅🏻♂️ المهارات
ابدأ ركز على تطوير لغتك مع بداية مذاكرتك للايلتس، ما انصحك أبدا انه تركز على تطوير لغتك فترة وبعدها تذاكر للايلتس.. أنا سويت هذي الغلطة من قبل وضيعت وقت على الفاضي.. والمقصود باللغة هنا هي المهارات الأربعة (استماع، قراءة، كتابة، محادثة)، لأنه اختبار الايلتس ما يقيس كم كلمة حفظتها أو كيف امورك في الجرامر!
الايلتس اختبار مهارات ويبغى يتأكد انه تقدر تميز الكلام إذا سمعت مقطع إنجليزي وتقدر تفهم المقال إذا قرأته وهكذا وبالتالي المطلوب منك انه تطور مهاراتك نفسها، تسمع كثييير.. تقرأ.. تكتب وتتكلم. وإذا خليتها عادة في يومك ومع شوي وقت راح تلاحظ تطور رهيب في مستواك باللغة الإنجليزية بشكل عام، باختصار أنصحك تخلي ساعة التطوير هذي ثابتة في يومك…
🔑 التكنيكات
عشان تجيب درجة قوية في الايلتس ما يكفي انه تكون لغتك قوية.. إذا شخص نيتف – لغته الأم الإنجليزية – دخل اختبار الايلتس بدون تحضير واستعداد لا تتوقع انه راح يجيب الـ ٩.. لأنه لازم توازن مذاكرتك بين الأعمدة الثلاثة.
والعمود الثاني هنا التكنيكات.. هي باختصار خدع في الايلتس تساعدك تجيب درجة أعلى.. بمعنى اخر هي طرق حل مختلفة عن اللي تعودت عليه عشان تتغلب على عنصر الوقت بالاختبار زي مثلا الكتابة.. بدون تكنيكة “القوالب” ما راح يمديك تكتب ٤ صفحات في ٦٠ دقيقة.. بدون “تكنيكة حاد” ما راح يمديك تحل ٣ قطع أكاديمية ومرة طويلة في ٦٠ دقيقة.. عشان كذا من أهم عناصر استعدادك للايلتس انه تعرف تكنيكات وطرق الحل لكل قسم وتتدرب عليها وتتمكن منها قد ما تقدر.
🏋🏻♀️ الممارسة
كل اللي سويته من تطوير للغة وتعلم للتكنيكات ما راح يوصلك للنتيجة المطلوبة إلا إذا تابعته بممارسة وتدرب وحل مكثف على اختبارات تجريبية، وتعود على ضغط الوقت. ما ينفع تطبق كل اللي تعلمته أول مرة يوم الاختبار.. لانه زي ما وضحت قبل شوي التكنيكات هذي طرق حل مختلفة ما تدربت عليها من قبل.. فعشان تتقنها لازم تتدرب عليها كثير..
زي بالضبط إذا أنت تسوق دراجة يومياً وحاولت تسوق سيارة لأول مرة في حياتك راح تكون مرة بطىء وتسوي أخطاء وتحس انه الدراجة كانت أسرع من السيارة.. لكن مع الممارسة راح تصير حريف في سواقة السيارة وتوصل أسرع بعشرات المرات من الدراجة.. عشان كدا أنصحك تتدرب على الأقل على ٧ اختبارات تجريبية قبل اختبارك الفعلي.
أفضل مصادر للتدرب:
وانت تدرب مهم تدرب على نفس نمط اختبارك.. بمعنى انه اذا اختبارك ورقي اطبع الاختبار وتدرب ْعلى ورق وإذا اختبارك محوسب تدرب اونلاين من الموقع مباشرة.. ودحين راح اشاركك افضل مصادر للتدرب على اختبارات تجريبية واقعية.
المصدر الاول:
من هنا يمديك تدخل للموقع.. بس تحتاج اول شيء وتعبي بياناتك وبعدها حتلاقي كل اختبارات متاحة عندك ومجانا بالكامل وكمان متاح فيه خاصية تحميل الاختبار عشان تطبعه وتدرب.
المصدر الثاني:
من هنا يمديك تدخل للموقع مباشرة وتختبر على طول ما يحتاج تسوي حساب…
إذا استفدت شارك هذا المقال 💛
وإذا عندك اي سؤال ارسلي في تويتر من هنا
0 تعليق